കൊച്ചി: ശബരിമല സ്വര്ണക്കൊള്ള കേസില് പ്രതികളായവരുടെയും ആരോപണവിധേയരുടെയും മൊഴികള് രേഖപ്പെടുത്താനൊരുങ്ങി എന്ഫോഴ്സ്മെന്റ് ഡയറക്ടറേറ്റ്(ഇഡി). മുന് മന്ത്രി കടകംപള്ളി സുരേന്ദ്രനടക്കം 12 പേര്ക്ക് നോട്ടീസ് അയയ്ക്കാന് നിയമോപദേശം ലഭിച്ചതിനു പിന്നാലെയാണ് കേസില് വിശദമായ ചോദ്യം ചെയ്യലിന് ഇഡി ഒരുങ്ങുന്നത്.
ഉണ്ണികൃഷ്ണന് പോറ്റി, കര്ണാടത്തിലെ ജ്വല്ലറി ഉടമ ഗോവര്ധന്, ചെന്നൈ സ്മാര്ട്ട് ക്രിയേഷന്സ് ഉടമ പങ്കജ് ഭണ്ഡാരി, തിരുവിതാംകൂര് ദേവസ്വം ബോര്ഡ് മുന് അഡ്മിനിസ്ട്രേറ്റീവ് ഓഫീസര് മുരാരി ബാബു എന്നിവരെയാകും ആദ്യഘട്ടത്തില് ചോദ്യംചെയ്യുക.
സാക്ഷികള്ക്കു നല്കുന്ന സമന്സാകും കടകംപള്ളി സുരേന്ദ്രനു നല്കുക. പ്രതികളുടെ ചോദ്യംചെയ്യല് പൂര്ത്തിയാകുന്ന മുറയ്ക്ക് കടകംപള്ളി സുരേന്ദ്രനെയും വിളിച്ചുവരുത്താനാണ് ഇഡി നീക്കം. എന്നാല്, ചോദ്യം ചെയ്യാനുള്ളവരുടെ പട്ടികയില് തന്ത്രി കണ്ഠര് രാജീവരെ ഇതുവരെ ഉള്പ്പെടുത്തിയിട്ടില്ലെന്നാണു സൂചന.
അതിനിടെ, കേസുമായി ബന്ധപ്പെട്ട് വിവിധയിടങ്ങളില് ഇഡി നടത്തിയ പരിശോധനയില് പിടിച്ചെടുത്ത രേഖകളില് വ്യക്തത തേടി പ്രതികള്ക്കും സ്ഥാപനങ്ങള്ക്കും ഇഡി നോട്ടീസ് അയച്ചു.
ഉണ്ണികൃഷ്ണന് പോറ്റി, മുരാരി ബാബു, ചെന്നൈയിലെ സ്മാര്ട്ട് ക്രിയേഷന്സ് എന്നിവരോടാണു വ്യക്തത തേടിയിട്ടുള്ളത്. നേരിട്ടോ അഭിഭാഷകന് മുഖേനയോ വിവരങ്ങള് അറിയിക്കാനാണു നിര്ദേശം.
E-paper LOGIN
LOGIN