തിരുവല്ല: ആരുമില്ല എന്ന നിലവിളിയുടെ നടുവിൽ അവരെ ചേർത്തുപിടിച്ച് ഞങ്ങൾ ഒപ്പമുണ്ട് എന്ന് പറയുന്നതാണ് ക്രിസ്മസ് എന്നും സാധാരണ മനുഷ്യരുടെ പ്രശ്നങ്ങളിൽ ഇടപെട്ട് അവർക്ക് സ്നേഹവും കരുതലുമായി മാറണമെന്നും ഡോ. യൂഹാനോൻ മാർ ക്രിസോസ്റ്റമോസ് മെത്രാപ്പോലീത്ത.
കേരള കൗൺസിൽ ഓഫ് ചർച്ചസും നവോദയ ആർട്സ് ആൻഡ് സ്പോർട്സ് ക്ലബും ചേർന്ന് നടത്തിയ ജനകീയ ക്രിസ്മസ് ആഘോഷം മുത്തൂർ ഇടത്തിട്ടയിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സോണൽ പ്രസിഡന്റ് റവ. ബിനു വർഗീസ് അധ്യക്ഷത വഹിച്ചു. ഭാരത് സേവക് സമാജ് സംസ്ഥാന ചെയർമാൻ ഡോ. രമേശ് ഇളമൺ നമ്പൂതിരി സന്ദേശം നല്കി.
കെസിസി ജനറൽ സെക്രട്ടറി ഡോ. പ്രകാശ് പി. തോമസ് , സോണൽ സെക്രട്ടറി ലിനോജ് ചാക്കോ, കെസിസി കറന്റ് അഫയേഴ്സ് കമ്മിറ്റി ചെയർമാൻ ജോജി പി. തോമസ്, ഫാ. പ്രദീപ് വർക്കി, വർഗീസ് ടി. മങ്ങാട്, ആനി ചെറിയാൻ, പ്രോഗ്രാം കൺവീനർ ലീലാമ്മ ജോർജ്, ഫാ. ഷിജു മാത്യു, റവ. അനി അലക്സ്, ക്ലബ് പ്രസിഡന്റ് വിനോദ് വർഗീസ്, സെക്രട്ടറി വരുൺ രാജ് എന്നിവർ പ്രസംഗിച്ചു.
മുനിസിപ്പൽ കൗൺസിലറായി തെരത്തെടുക്കപ്പെട്ട പി.എസ്. സുരേഷ് കുമാർ, എം ടെക് പവർ സിസ്റ്റം എൻജിനിയറിംഗിൽ ഒന്നാം റാങ്ക് നേടിയ നിതിൻ മാത്യു എന്നിവരെ അനുമോദിച്ചു. വിവിധ ഇടവക ഗായകസംഘങ്ങൾ ഗാനങ്ങൾ ആലപിച്ചു.