തൊടുപുഴ: മുട്ടത്തിനു സമീപം കൊല്ലംകുന്ന് മലയില് വന് കാട്ടുതീ. ഫയര് ബീറ്ററുകളും പച്ചിലക്കമ്പുകളുമായി ഫയര്ഫോഴ്സ് സംഘവും നാട്ടുകാരും ചേര്ന്ന് സാഹസികമായി തീ നിയന്ത്രണവിധേയമാക്കി.
തിങ്കളാഴ്ച രാത്രിയാണ് ഇവിടെ തീപിടിത്തമുണ്ടായത്. ഫയര്ഫോഴ്സ് വാഹനം എത്താത്ത പ്രദേശത്തേക്ക് കിലോമീറ്ററുകളോളം കാല്നടയായി സഞ്ചരിച്ച് ചെങ്കുത്തായ മലനിരകളില് ജീവന് പണയപ്പെടുത്തിയാണ് രക്ഷാപ്രവര്ത്തകര് തീയണച്ചത്.
കൃഷിസ്ഥലം ഒരുക്കുന്നതിനായി അശ്രദ്ധമായി തീയിട്ടതാണ് അപകടത്തിന് കാരണമായതെന്നാണ് സൂചന. കൊല്ലംകുന്ന് മലയുടെ മുകള്ഭാഗത്ത് തീ പടരുന്നത് കണ്ട് മുട്ടം പഞ്ചായത്ത് പ്രസിഡന്റും വാര്ഡ് അംഗവുമാണ് വിവരം ഫയര്ഫോഴ്സിനെ അറിയിച്ചത്.
തൊടുപുഴയില് നിന്നും അഗ്നി രക്ഷാം സേന ഉടന് സ്ഥലത്തെത്തിയെങ്കിലും വാഹനങ്ങള് മലമുകളിലേക്ക് എത്തിക്കാന് സാധിക്കുമായിരുന്നില്ല. രണ്ട് കിലോമീറ്ററോളം ദൂരം ചെങ്കുത്തായ മലനിരകളിലൂടെ സഞ്ചരിച്ചാണ് സേനാംഗങ്ങള് തീപിടുത്തം ഉണ്ടായ ഇടത്തെത്തിയത്.
വാട്ടര് ടാങ്കറുകള് എത്തിക്കാന് കഴിയാത്ത സാഹചര്യത്തില് ഫയര് ബീറ്ററുകള്, പച്ചിലക്കമ്പുകള് എന്നിവ ഉപയോഗിച്ചാണ് തീ അണയ്ക്കാനുള്ള ശ്രമം തുടങ്ങിയത്. ഒരു വശത്ത് ചെങ്കുത്തായ താഴ്ചയും മറുവശത്ത് ആളിപ്പടരുന്ന തീയും വലിയ പ്രതിസന്ധി സൃഷ്ടിച്ചു.സേനാംഗങ്ങളും നാട്ടുകാരും ചേര്ന്ന് മണിക്കൂറുകളോളം പൊരുതി തീ നിയന്ത്രണവിധേയമാക്കിയത്.
കാറ്റ് ശക്തമായത് തീ മറ്റ് ഭാഗങ്ങളിലേക്ക് വ്യാപിക്കാന് ഇടയാക്കിയെങ്കിലും രക്ഷാപ്രവര്ത്തകരുടെ കൃത്യമായ ഇടപെടല് മൂലം വലിയ ദുരന്തം ഒഴിവാക്കി. വേനല് കടുക്കുന്ന സാഹചര്യത്തില് മലയോരങ്ങളില് തീ പടരുന്നത് തടയാന് കര്ശന ജാഗ്രത പാലിക്കണമെന്ന് തൊടുപുഴ ഫയര്ഫോഴ്സ് അറിയിച്ചു.
E-paper LOGIN
LOGIN
