കൊച്ചി: ദൈവത്തിന്റെ രക്ഷാകരസന്ദേശം സന്ദേശവാഹകരിലൂടെ ലോകത്തെത്തിയതുപോലെ ഇന്നു മനുഷ്യന്റെ വേദനകളും പ്രത്യാശകളും ലോകത്തിന്റെ മനഃസാക്ഷിയിലേക്കെത്തിക്കുന്നത് മാധ്യമങ്ങളിലൂടെയാണെന്ന് സീറോ മലബാർ സഭാ മേജർ ആർച്ച്ബിഷപ് മാർ റാഫേൽ തട്ടിൽ.
സത്യം, നീതി, സമാധാനം എന്നിവയുടെ സേവകരാകുമ്പോൾ മാധ്യമപ്രവർത്തകർ ക്രിസ്മസ് ദൗത്യത്തിന്റെ തുടർച്ചക്കാരായി മാറുന്നു. മുറിച്ച് പങ്കിടുകയെന്നതുകൂടിയാണ് ക്രിസ്മസിന്റെ സാരമെന്നും മാർ റാഫേൽ തട്ടിൽ ഓർമിപ്പിച്ചു.
സീറോമലബാർ സഭയുടെ ആസ്ഥാനമായ കാക്കനാട് മൗണ്ട് സെന്റ് തോമസിൽ മാധ്യമപ്രവർത്തകരുടെ ക്രിസ്മസ് സംഗമത്തിൽ സന്ദേശം നൽകുകയായിരുന്നു മേജർ ആർച്ച്ബിഷപ്.
സീറോമലബാർ സഭാ മേജർ ആർക്കി എപ്പിസ്കോപ്പൽ കൂരിയ ചാൻസലർ റവ. ഡോ. ഏബ്രഹാം കാവിൽപ്പുരയിടത്തിൽ, പിആർഒ റവ. ഡോ. ടോം ഓലിക്കരോട്ട് എന്നിവർ പ്രസംഗിച്ചു. മൗണ്ട് സെന്റ് തോമസിലെ വൈദികരും സന്യസ്തരും ചേർന്ന് കരോൾഗാനം ആലപിച്ചു. മാധ്യമപ്രവർത്തകരും സഭാ നേതൃത്വവും തമ്മിലുള്ള സൗഹൃദസംഭാഷണവും സ്നേഹവിരുന്നും ഉണ്ടായിരുന്നു.
E-paper LOGIN
LOGIN
