ന്യൂഡൽഹി: നടനും ഗായകനും റിയാലിറ്റി ഷോ ജേതാവുമായ പ്രശാന്ത് തമാംഗ് (43) അന്തരിച്ചു. ഹൃദയാഘാതത്തെത്തുടർന്ന് ഇന്നലെ രാവിലെ ഡൽഹി ജനക്പുരിയിലെ വസതിയിലായിരുന്നു അന്ത്യം. 2007ലെ ഇന്ത്യൻ ഐഡൽ റിയാലിറ്റി ഷോ ജേതാവാണ് തമാംഗ്. 2010ൽ പുറത്തിറങ്ങിയ ‘ധന്യവാദ്’ ആണ് ആദ്യ ആൽബം. 2010ൽ ഗൂർഖ പാൽട്ടൺ എന്ന നേപ്പാളി സിനിമയിലൂടെയാണ് തമാംഗ് അഭിനയരംഗത്ത് അരങ്ങേറ്റം കുറിച്ചത്.
ഏപ്രിൽ 17നു റിലീസ് ചെയ്യാനിരിക്കുന്ന സൽമാൻ ഖാൻ ചലച്ചിത്രം ബാറ്റിൽ ഓഫ് ഗൽവാനിൽ പ്രശാന്ത് തമാംഗ് അഭിനയിച്ചിട്ടുണ്ട്.
1983 ജനുവരി നാലിന് ഡാർജിലിംഗിലെ ഗൂർഖ കുടുംബത്തിലാണ് തമാംഗ് ജനിച്ചത്. ഇദ്ദേഹത്തിന്റെ പിതാവ് ബംഗാൾ പോലീസിൽ സേവനമനുഷ്ഠിച്ചിട്ടുണ്ട്. സർവീസിലിരിക്കേ പിതാവ് മരിച്ചതിനെത്തുടർന്ന് പ്രശാന്ത് തമാംഗിനു പോലീസിൽ ജോലി ലഭിച്ചു.
സുഹൃത്തുക്കളുടെ പ്രേരണയാലാണ് തമാംഗ് ഇന്ത്യൻ ഐഡൽ റിയാലിറ്റി ഷോയിൽ പങ്കെടുത്തത്. തമാംഗിന്റെ വിജയത്തിൽ ഡാർജിലിംഗ് കുന്നുകളിലും സിക്കിമിലും നേപ്പാളിലും വലിയ ആഘോഷം നടന്നു.