കൊല്ലം: ശബരിമല സ്വര്ണക്കൊള്ളയില് റിമാന്ഡില് കഴിയുന്ന തിരുവിതാംകൂര് ദേവസ്വം ബോര്ഡ് മുന് കമ്മീഷണറും പ്രസിഡന്റുമായ എന്. വാസുവിന്റെ ജാമ്യ ഹർജിയില് ഇന്ന് കൊല്ലം വിജിലന്സ് കോടതി വിധി പറയും.
റിമാന്ഡ് കാലാവധി 90 ദിവസം പിന്നിട്ടതോടെയാണ് സ്വാഭാവിക ജാമ്യം തേടി കേസിലെ മൂന്നാം പ്രതിയായ വാസു കൊല്ലം വിജിലന്സ് കോടതിയെ സമീപിച്ചത്. 90 ദിവസത്തിനുള്ളില് കുറ്റപത്രം സമര്പ്പിക്കാത്തതിനാല് സ്വഭാവിക ജാമ്യത്തിന് അര്ഹതയുണ്ടെന്നു ചൂണ്ടിക്കാട്ടിയാണ് ജാമ്യ ഹർജി നല്കിയത്.
എസ്ഐടി കേസില് കുറ്റപത്രം സമര്പ്പിക്കാത്തതും പ്രതിഭാഗം ഇന്നലെ കേസ് പരിഗണിച്ചപ്പോള് ചൂണ്ടിക്കാട്ടി. ഇന്നലെ തന്നെ ജാമ്യം അനുവദിക്കണമെന്നും പ്രതിഭാഗം കോടതിയില് വാദിച്ചു. തുടര്ന്ന് ഇക്കാര്യത്തില് വിവേചനം കാണിക്കാന് പറ്റില്ലെന്നും ഇന്നു ജാമ്യഹര്ജിയില് വിധി പറയുമെന്നും കൊല്ലം വിജിലന്സ് കോടതി ജഡ്ജി ഡോ. സി.എസ്. മോഹിത് വ്യക്തമാക്കി. എന്നാല് ജാമ്യം അനുവദിക്കുകയാണെങ്കില് മറ്റു പ്രതികള്ക്കു സ്വാഭാവിക ജാമ്യം നല്കിയ കര്ശന ഉപാധികള് വേണമെന്ന് പ്രോസിക്യൂഷനും ആവശ്യപ്പെട്ടു.
അതേസമയം, കേസില് ദേവസ്വം മുന് പ്രസിഡന്റും സിപിഎം നേതാവുമായ എ.പത്മകുമാറിനെ വീണ്ടും റിമാന്ഡ് ചെയ്തു. 14 ദിവസത്തേക്കാണ് കോടതി റിമാന്ഡ് ചെയ്തത്. അതിനിടെ തന്ത്രി കട്ടിളപ്പാളി, ദ്വാരപാലക കേസുകളില് പ്രതിയായി റിമാന്ഡില് കഴിയുന്ന കണ്ഠര് രാജീവരുടെ ജാമ്യാപേക്ഷയില് ഇന്നലെ പ്രോസിക്യൂഷന്റെ വാദം നടന്നു. കഴിഞ്ഞ ദിവസം പ്രതിഭാഗത്തിന്റെ വാദം പൂര്ത്തിയായിരുന്നു. ജാമ്യ ഹർജിയില് വിധി 18ലേക്കു മാറ്റി.
കണ്ഠര് രാജീവര്ക്ക് ജാമ്യം അനുവദിക്കരുതെന്നും കൂടുതല് അന്വേഷണം നടക്കുകയാണെന്നും തന്ത്രിക്ക് ഇപ്പോള് ജാമ്യം നല്കിയാല് തെളിവുകള് നശിപ്പിക്കുമെന്നും അത് അന്വേഷണത്തെ ബാധിക്കുമെന്നും പ്രോസിക്യൂഷന് വാദിച്ചു. ആചാരപരമായ കാര്യങ്ങളില് മാത്രം ഇടപെടുന്നയാളാണ് തന്ത്രിയെന്നും സ്വര്ണക്കൊള്ളയില് പങ്കില്ലെന്നുമായിരുന്നു പ്രതിഭാഗത്തിന്റെ വാദം. വാദങ്ങള് കേട്ട കോടതി എസ്ഐടി റിപ്പോര്ട്ട് കൂടി പരിഗണിച്ചാകും വിധി പറയുക.
E-paper LOGIN
LOGIN
