കാസര്ഗോഡ്: മൊബൈല് ഫോണ് ചാര്ജ് ചെയ്യുന്നതിനിടെ ഷോട്ട് സര്ക്യൂട്ടുണ്ടായി കിടപ്പുമുറി കത്തിനശിച്ചു. മധൂര് ഉളിയത്തടുക്ക ഭഗവതി നഗറിലെ വൈദ്യര്വളപ്പില് ചിത്രകുമാരിയുടെ ഓടിട്ട വീട്ടിലാണ് അപകടം. ബുധനാഴ്ച രാത്രി ഒന്പതരയോടെയാണ് സംഭവം. തീപിടിത്തം വീട്ടുകാരുടെ ശ്രദ്ധയില്പ്പെട്ടയുടനെ കാസര്ഗോഡ് അഗ്നിരക്ഷാസേനയുടെ സേവനം ആവശ്യപ്പെടുകയും സീനിയര് ഫയര് ആന്ഡ് റെസ്ക്യൂ ഓഫീസര് വി.എന്. വേണുഗോപാലിന്റെ നേതൃത്വത്തില് സേന എത്തി തീയണയ്ക്കുകയുമായിരുന്നു.
വസ്ത്രങ്ങള് സൂക്ഷിച്ചിരുന്ന അലമാര, മേശ, കട്ടില്, ബെഡ്, റൂമിന്റെ സീലിംഗ്, മറ്റു സാധന സാമഗ്രികള് എന്നിവയെല്ലാം പൂര്ണമായും കത്തിനശിച്ചു. മറ്റ് ഭാഗങ്ങളില് തീ പടരാതിരുന്നതിനാല് വന് നഷ്ടം ഒഴിവായി. ചിത്രകുമാരിയും കൊച്ചുമകനും മാത്രമാണ് താമസം.
തീപിടിത്തത്തില് 50,000 രൂപയുടെ നഷ്ടം വന്നതായി കരുതുന്നു. സേനാംഗങ്ങളായ ഇ. പ്രസീദ്, ജെ.എ. അഭയ് സെന്, ജെ.ബി. ജിജോ, എ. രാജേന്ദ്രന് എന്നിവര് സംഘത്തില് ഉണ്ടായിരുന്നു.
E-paper LOGIN
LOGIN
