മലപ്പുറം: രോഗരഹിത സമൂഹത്തിന് വാക്സിനുകൾ അനിവാര്യമാണെന്നും ശാസ്ത്രീയമായി തെളിയിച്ച ആരോഗ്യസുരക്ഷാ മാർഗമായ വാക്സിനുകൾ കുട്ടികൾക്ക് നൽകാൻ രക്ഷിതാക്കൾ ശ്രദ്ധിക്കണമെന്നും ജില്ലാ പഞ്ചായത്ത് ആരോഗ്യവിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ. അസ്ലു പറഞ്ഞു. തവനൂർ കെഎംജിയുപി സ്കൂളിൽ ജപ്പാനീസ് എൻസഫലൈറ്റിസ് വാക്സിനേഷന്റെ ജില്ലാതല ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം.
ചടങ്ങിൽ ബ്ലോക്ക് പഞ്ചായത്ത് പ്രസിഡന്റ് അഡ്വ. ആർ. ഗായത്രി അധ്യക്ഷത വഹിച്ചു. കൊതുകുകൾ വഴി പകരുന്ന, തലച്ചോറിനെ ബാധിക്കുന്ന വൈറസ് രോഗമായ ജപ്പാനീസ് എൻസഫലൈറ്റിസ് കുട്ടികളെയാണ് പ്രധാനമായും ബാധിക്കുന്നത്. ബാധിതരിൽ 30 ശതമാനം പേർക്ക് മരണവും 50 ശതമാനം പേർക്ക് വൈകല്യങ്ങളും സംഭവിക്കാം.
ചികിത്സയില്ലാത്ത രോഗത്തെ പ്രതിരോധിക്കുന്നതിന് സുരക്ഷിതവും ഫലപ്രദവുമായ മാർഗം വാക്സിനേഷനാണ്. പരിപാടിയിൽ ജില്ലാ മെഡിക്കൽ ഓഫീസർ ടി.കെ. ജയന്തി മുഖ്യപ്രഭാഷണം നടത്തി.
ജില്ലാ സർവൈലൻസ് ഓഫീസർ ഡോ. സി ഷുബിൻ വിഷയാവതരണം നടത്തി. ബ്ലോക്ക് പഞ്ചായത്ത് വൈസ്പ്രസിഡന്റ് എ.പി. വിമൽ, പഞ്ചായത്തംഗം പി.വി. ശ്രീനിവാസൻ, ജില്ലാ ആർസിഎച്ച് ഓഫീസർ ഡോ. എൻ.എൻ പമീലി, ബ്ലോക്ക് മെഡിക്കൽ ഓഫീസർ ഡോ. ഷാജി അറയ്ക്കൽ, ജില്ലാ എഡ്യൂക്കേഷൻ മീഡിയ ഓഫീസർ കെ.പി. സാദിഖ് അലി, പിടിഎ പ്രസിഡന്റ് ടി.എം. പരമേശ്വരൻ, പ്രധാനധ്യാപിക എസ്. ബിന്ദു, ഫീൽഡ് സൂപ്പർവൈസർമാരായ കെ.എം. ശ്രീജിത്, കെ. ശ്യാമള, രാജേഷ് പ്രശാന്തിയിൽ എന്നിവർ പങ്കെടുത്തു.