പുനെ: ഭർതൃ വീട്ടിൽ നവവധുവ് കൊടിയ പീഡനമേറ്റതായി പരാതി. വിവാഹ ദിനം മുതൽ തന്നോട് അടുപ്പം കാണിക്കാതിരുന്ന ഭർത്താവ് സ്വവർഗാനുരാഗിയാണെന്നും യുവതി നൽകിയ പരാതിയിൽ പറയുന്നു. സംഭവത്തിൽ യുവതിയുടെ ഭർത്താവിനും നാല് ബന്ധുക്കൾക്കുമെതിരെ കേസെടുത്തു.
തന്റെ സ്വകാര്യ ഭാഗങ്ങളിൽ ഉൾപ്പെടെ ഭർത്താവ് സിഗരറ്റ് കുറ്റികൊണ്ട് പൊള്ളിച്ചായി 29കാരി നൽകിയ പരാതിയിൽ പറയുന്നു. മഹാരാഷ്ട്രയിലെ പുനെയിൽ യെർവാഡയിലാണ് സംഭവം. ഈ വർഷം ഏപ്രിലിലാണ് പരാതിക്കാരിയും 33കാരനായ യുവാവും വിവാഹിതരായത്.
വിവാഹം കഴിഞ്ഞ് ശാരീരിക ബന്ധമൊന്നും ഉണ്ടാകാത്തതിനെത്തുടർന്ന് വൈദ്യപരിശോധന നടത്താമെന്ന് യുവതി പറഞ്ഞപ്പോൾ താൻ പൂർണ ആരോഗ്യവാനാണ് എന്നായിരുന്നു യുവാവിന്റെ മറുപടി. എന്നിട്ടും പെരുമാറ്റത്തിൽ മാറ്റമൊന്നും ഉണ്ടായില്ലെന്ന് യുവതി പറഞ്ഞു.
തുടർന്ന് യുവതി ഭർതൃവീട്ടുകാരെ സമീപിച്ചപ്പോൾ ഇക്കാര്യം പുറത്തുപറയരുതെന്ന് ഭീഷണിപ്പെടുത്തുകയാണുണ്ടായതെന്ന് യുവതി പറയുന്നു. പിന്നീട് താൻ സ്വവർഗാനുരാഗിയാണെന്ന് ഭർത്താവ് സമ്മതിച്ചതായും യുവതി പറഞ്ഞു. മാതാപിതാക്കളുടെ വീട്ടിൽ തിരിച്ചെത്തിയ യുവതി യർവാഡ സ്റ്റേഷനിൽ പരാതി നൽകുകയായിരുന്നു.