ദൈവം ഭൂമിയെ സ്പർശിച്ച ആ ആർദ്രമായ നിമിഷത്തിൽ, ലോകം ദൈവത്തിന്റെ സ്വന്തമായി! ക്രിസ്മസ് ജനനത്തെക്കുറിച്ചുള്ള കഥ മാത്രമല്ല; എല്ലാം മാറ്റിമറിച്ച സ്പർശനത്തിന്റെ സമയം കൂടിയാണ്.
സ്നേഹസ്പർശനത്തിന് മറ്റൊന്നിനെ പൂർണമായും സ്വന്തമാക്കാൻ കഴിയും എന്നതിന്റെ ഉദാത്തമായ തെളിവാണ് ക്രിസ്മസ്. ദൈവം ഭൂമിയിലേക്ക് തന്റെ കരങ്ങൾ നീട്ടിയപ്പോൾ, അവിടുന്ന് ഒരു സന്ദേശം അയയ്ക്കുക മാത്രമല്ല ചെയ്തത് - അവൻ നമ്മുടെ ജീവിതത്തിന്റെ ഭാഗമായി, മിശിഹാ സ്വർഗം ഭൂമിയിലേക്ക് കൊണ്ടുവന്നു, ദൈവത്തിന്റെ സ്നേഹം മനുഷ്യശരീരത്തിൽ പൊതിഞ്ഞു. അങ്ങനെ നൽകലും വിട്ടുകൊടുക്കലും ഒന്നുചേർന്നപ്പോൾ സ്നേഹം ഭൂമിയിൽ ജനനമെടുത്തു. അതുവഴി ദൈവത്തിന്റെ സ്പർശനം ഭൂമിയെ പുൽകി.
ലോകത്തിനുവേണ്ടി ചെറുതാകാൻ അവിടുന്ന് കാണിച്ച സ്നേഹത്തെ അനുസ്മരിക്കുന്ന ഈ ദിനങ്ങളിൽ നമ്മുടെ അഹംഭാവങ്ങൾ ഇല്ലാതാക്കിക്കൊണ്ട് മറ്റുള്ളവർക്കായി സ്വയം ചെറുതാകാൻ നമുക്ക് പഠിക്കാം. നാം പങ്കിടുന്ന സ്നേഹത്തിൽനിന്നും മറ്റുള്ളവർക്കായി തുറക്കപ്പെടുന്ന നമ്മുടെ ഹൃദയങ്ങളിൽനിന്നും ശാന്തിയും സമാധാനവും ലോകത്തിൽ നിറയട്ടെ. അതുവഴി സ്വർഗത്തിന്റെ സ്പർശം വീണ്ടും ഭൂമിയിൽ പുനർജ്ജനിക്കട്ടെ.
“ഇതാ, സകലവും ഞാന് നവീകരിക്കുന്നു”(വെളിപാട് 21:05). അവിടുന്ന് സകലതും നവീകരിക്കുകയും അവിടുത്തേക്ക് യോഗ്യമാക്കുകയും ചെയ്യുന്നു. ക്രിസ്മസ് ഒന്നിന്റെയും അവസാനമല്ല; ഒരു പുതിയ തുടക്കമാണ്. അതുകൊണ്ട് മിശിഹായുടെ തിരുപ്പിറവി നാം ആഘോഷിക്കുമ്പോൾ സ്നേഹംകൊണ്ട് ഭൂമിയെ സ്പർശിച്ച ദൈവം വാഗ്ദാനം ചെയ്ത ഒരു നവീകരണത്തിനായി നമ്മുടെ ഹൃദയം തുറക്കാം.നമുക്ക് അവിടുത്തെ ദയ പ്രതിഫലിപ്പിക്കാം, അവിടുത്തെ സന്തോഷം പങ്കിടാം, അവിടുത്തെ സ്നേഹസ്പർശനം ലോകത്തിനു വീണ്ടും നമുക്ക് നൽകാം. ഏവർക്കും മിശിഹായുടെ തിരുപ്പിറവിയുടെ മംഗളങ്ങൾ നേരുന്നു.
E-paper LOGIN
LOGIN
