കണ്ണൂർ: രക്തസാക്ഷി ഫണ്ട് തട്ടിപ്പിൽ ആരോപണം നേരിടുന്ന ടി.എ. മധുസൂദനൻ എംഎൽഎയെ സംരക്ഷിച്ച് പാർട്ടി. എംഎൽഎയുടെ രാജി ആവശ്യപ്പെട്ട് കോൺഗ്രസും ബിജെപിയും നടത്തിയ മാർച്ചിനു നേരെ സിപിഎം ആക്രമണം നടത്തിയിരുന്നു.
ഇതിനു പിന്നാലെ ഭീഷണിയുമായി പയ്യന്നൂർ ഏരിയാ സെക്രട്ടറി പി. സന്തോഷ് കുമാർ രംഗത്തെത്തി. കഴിഞ്ഞത് സാമ്പിൾ വെടിക്കെട്ട് മാത്രമാണ്. എംഎൽഎക്കെതിരെ പ്രതിഷേധിക്കാൻ വന്നാൽ വരുന്നവർ സ്വന്തം തടി കാക്കേണ്ടി വരുമെന്നും ഏരിയാ സെക്രട്ടറി ഭീഷണി മുഴക്കി.
അപവാദ പ്രചാരണങ്ങൾക്ക് മുൻപിൽ നേതാവിനെ ഇട്ടുകൊടുത്ത് തടി തപ്പുന്നവരല്ല കമ്യൂണിസ്റ്റുകാർ. ഇരിക്കുന്ന കൊമ്പ് മുറിക്കുന്നവർക്കൊപ്പം പാർട്ടി പ്രവർത്തകർ പോകില്ലെന്നും സന്തോഷ് കുമാർ കൂട്ടിച്ചേർത്തു.