കോഴിക്കോട്: നാട്ടിലാകെ മദ്യശാലകള് തുറന്ന് ജനങ്ങളെ കുടിപ്പിച്ചു കിടത്തുന്ന ബിവറേജസ് കോര്പറേഷന് (ബെവ്കോ) റോഡ് സുരക്ഷയ്ക്കായി പോലീസിനു സംഭാവന നല്കുന്നത് 10 ലക്ഷം രൂപ. സുരക്ഷാ ബോര്ഡുകള് സ്ഥാപിക്കാനുള്ള പോലീസിന്റെ പദ്ധതി നടപ്പാക്കാനാണ് 10 ലക്ഷം നല്കുന്നത്.
പോലീസ് മേധാവിയുടെ അഭ്യര്ഥന മാനിച്ച് കോര്പറേറ്റ് സോഷ്യല് റെസ്പോണ്സിബിലിറ്റി (സിഎസ്ആര്) ഫണ്ടില് നിന്നാണു തുക അനുവദിക്കുക. സംസ്ഥാനത്തെ ഇരട്ടവരി പാതകളിലടക്കം അച്ചടക്കം പ്രോത്സാഹിപ്പിക്കുന്നതിനായി അടയാള ബോര്ഡുകളും വിവരദായക ബോര്ഡുകളുമാണ് പോലീസ് സ്ഥാപിക്കാനുദേശിക്കുന്നത്.
ദേശീയപാതകള്, സംസ്ഥാനപാതകള്, പ്രധാന ജില്ലാ റോഡുകള് എന്നിവിടങ്ങളിലായി 552 ബോര്ഡുകള് സ്ഥാപിക്കാനാണ് സംസ്ഥാന പോലീസ് മേധാവി തയാറാക്കിയ പദ്ധതി.
ഒരു ബോര്ഡിന് 15,965 നിരക്കില് മൊത്തം 88.13 ലക്ഷമാണ് പദ്ധതിയുടെ മതിപ്പ് ചെലവ്. ആഭ്യന്തര വകുപ്പിന്റെ അനുമതിയോടെ ബിവറേജസ് കോര്പറേഷനുമായി ഇന്സ്പെക്ടര് ജനറല് ഓഫ് പോലീസ് (ട്രാഫിക് ആന്ഡ് റോഡ് സുരക്ഷാ മാനേജ്മെന്റ്) നടത്തിയ ചര്ച്ചയിലാണ് സിഎസ്ആര് ഫണ്ട് അനുവദിക്കാന് തീരുമാനമായത്.
കെല്ട്രോണ് സമര്പ്പിച്ച എസ്റ്റിമേറ്റ് പ്രകാരം 9,89,855 രൂപ ചെലവില് 62 ബോര്ഡുകള് തെരഞ്ഞെടുക്കപ്പെട്ട സ്ഥലങ്ങളില് സ്ഥാപിക്കാന് ബെവ്കോ ഫണ്ട് സഹായകരമാകും.