കൊല്ലം: കേരളം വഴി സർവീസ് നടത്തുന്ന രണ്ട് ട്രെയിനുകൾ എൽഎച്ച്ബി കോച്ചുകളിലേക്ക് മാറുന്നതിന് പ്രഖ്യാപിച്ച തീയതി ദീർഘിപ്പിച്ച് റെയിൽവേ. ചെന്നൈ - ആലപ്പുഴ സൂപ്പർ ഫാസ്റ്റിന്റെ കോച്ചുകൾ ഫെബ്രുവരി ഒന്നു മുതൽ എൽഎച്ച്ബിയിലേക്ക് മാറുമെന്നായിരുന്നു അറിയിപ്പ്. ഇത് മാർച്ച് ഒന്നുമുതലേ പ്രാബല്യത്തിലാകൂ.
തിരികെയുള്ള ആലപ്പുഴ - ചെന്നൈ ട്രെയിനിൽ മാർച്ച് രണ്ട് മുതലും എൽഎച്ച്ബി കോച്ചുകൾ ഏർപ്പെടുത്തും. ചെന്നൈ-തിരുവനന്തപുരം സൂപ്പർ ഫാസ്റ്റ് എക്സ്പ്രസിൽ ഫെബ്രുവരി മൂന്നു മുതൽ എൽഎച്ച്ബി കോച്ചുകൾ ഏർപ്പെടുത്തുമെന്നായിരുന്നു പ്രഖ്യാപനം. ഇത് മാർച്ച് മൂന്നിലേക്ക് ദീർഘിപ്പിച്ചു. തിരികെയുള്ള തിരുവനന്തപുരം - ചെന്നൈ ട്രെയിനിൽ മാർച്ച് നാലുമുതലുമായിരിക്കും എൽഎച്ച്ബി കോച്ചുകൾ ഏർപ്പെടുത്തുക.
പുതുക്കിയ തീയതികൾ വരെ ഈ ട്രെയിനുകളിൽ ഐസിഎഫ് കോച്ചുകൾ മാത്രമായിരിക്കും ഉണ്ടാകുക. ടിക്കറ്റ് ബുക്കിംഗിലോ നിലവിലെ യാത്രാ സമയത്തിലോ മാറ്റമില്ലെന്ന് അധികൃതർ അറിയിച്ചു.