വഡോദര: 2026 വനിതാ പ്രീമിയര് ലീഗ് ട്വന്റി-20 ക്രിക്കറ്റ് ഫൈനലില് റോയല് ചലഞ്ചേഴ്സ് ബംഗളൂരുവിന്റെ ക്യാപ്റ്റന് സ്മൃതി മന്ദാന കളിച്ചത് കടുത്ത പനി വകവയ്ക്കാതെയെന്നു വെളിപ്പെടുത്തല്. ടീമിന്റെ മുഖ്യപരിശീലകനായ മലോലന് രംഗരാജനാണ് ഫൈനലിലെ ജയത്തിനുശേഷം ഇക്കാര്യം വെളിപ്പെടുത്തിയത്.
“തന്റെ ഏറ്റവും മികച്ച ഇന്നിംഗ് ഫൈനലിനായി സ്മൃതി കരുതിവച്ചിരിക്കുകയായിരുന്നു. സ്മൃതി ഫൈനല് കളിച്ചത് ശക്തമായ പനി വകവയ്ക്കാതെയാണ്. പനിയുള്ള കാര്യം ആരുമായും വെളിപ്പെടുത്താനും സ്മൃതി തയാറാകില്ല, അത്തരം സ്വഭാവക്കാരിയാണ് അവള്’’ - മലോലന് പറഞ്ഞു.
ഉറ്റസുഹൃത്തായ ജെമീമ റോഡ്രിഗസ് നയിച്ച ഡല്ഹി ക്യാപ്പിറ്റല്സിനെ ആറ് വിക്കറ്റിനു കീഴടക്കിയായിരുന്നു റോയല് ചലഞ്ചേഴ്സ് ബംഗളൂരു 2026 ഡബ്ല്യുപിഎല് കിരീടം സ്വന്തമാക്കിയത്. ഡല്ഹി മുന്നോട്ടുവച്ച 203/4 എന്ന റിക്കാര്ഡ് സ്കോര് ആര്സിബി പിന്തുടര്ന്നു ജയിച്ചത് സ്മൃതിയുടെ (41 പന്തില് 87) ഇന്നിംഗ്സിലൂടെയായിരുന്നു. ഫൈനലിലെ പ്ലെയര് ഓഫ് ദ മാച്ചും സ്മൃതിയാണ്.
ജോര്ജിയ വോളിനൊപ്പം (54 പന്തില് 79) സ്മൃതി രണ്ടാം വിക്കറ്റ് കൂട്ടുകെട്ടില് 165 റണ്സ് നേടി, വനിതാ പ്രീമിയര് ലീഗ് ചരിത്രത്തിലെ ഏതൊരു വിക്കറ്റിലെയും ഏറ്റവും ഉയര്ന്ന കൂട്ടുകെട്ട്. ഡബ്ല്യുപിഎല് ഫൈനലുകളിലെ ഏറ്റവും ഉയര്ന്ന സ്കോറും, ഡബ്യുപിഎല് ചരിത്രത്തിലെ ഏറ്റവും ഉയര്ന്ന റണ് ചേസിംഗുമായിരുന്നു വഡോദരയിലേത്.
ഡബ്ല്യുപിഎല്ലില് റോയല് ചലഞ്ചേഴ്സ് ബംഗളൂരുവിന്റെ രണ്ടാം കിരീടമാണ്. 2024ല് ആയിരുന്നു ആദ്യ കിരീട നേട്ടം. അതേസമയം, ഇതുവരെ അരങ്ങേറിയ നാല് ഡബ്ല്യുപിഎല്ലിന്റെയും ഫൈനലില് പ്രവേശിച്ചെങ്കിലും കിരീടത്തില് മുത്തമിടാന് ഡല്ഹി ക്യാപ്പിറ്റല്സിനു സാധിച്ചില്ല.
E-paper LOGIN
LOGIN