ആലിൻ ഷെറിൻ ഏബ്രഹാം മാതാപിതാക്കളായ അരുണിനും ഷെറിനുമൊപ്പം.
മല്ലപ്പള്ളി: അവയവദാനത്തിലൂടെ ചരിത്രത്തിലേക്കും അതുവഴി അനേകരുടെ സ്മരണകളിലും സ്ഥാനം നേടിയ ആലിൻ ഷെറിൻ ഏബ്രഹാമിന് ഇന്ന് മല്ലപ്പള്ളി യാത്രാമൊഴിയേകും. പത്തുമാസത്തെ ജീവിതത്തിനുശേഷം കടന്നുപോകുന്ന ആലിൻ നാലുപേരിലൂടെ ഇനി ജീവിക്കുമെന്നതാണ് ജന്മനാടിന് ആശ്വാസം.
മല്ലപ്പള്ളി പഞ്ചായത്ത് മുൻ പ്രസിഡന്റ് റെജി ശാമുവേലിന്റെ പേരക്കുട്ടിയാണ് ആലിൻ. മാതാപിതാക്കളായ അരുണിന്റെയും ഷെറിന്റെയും താത്പര്യപ്രകാരം പിഞ്ചുകുട്ടിയുടെ അവയവങ്ങൾ നാലുപേർക്കായാണ് ദാനം ചെയ്തിരിക്കുന്നത്. മല്ലപ്പള്ളിയിലെ ജോർജ് മാത്തൻ മിഷൻ ആശുപത്രിയിലും മല്ലപ്പള്ളി വെസ്റ്റ് മലയാറ്റൂർ വാലുമണ്ണിൽ വീട്ടിലും നെടുങ്ങാടപ്പള്ളി സെന്റ് തോമസ് സിഎസ്ഐ പള്ളിയിലുമായാണ് പൊതുദർശനം.
ജനപ്രതിനിധികളടക്കം വൻ ജനാവലി ആദരാഞ്ജലി അർപ്പിക്കാനെത്തും. പള്ളിയിൽ സംസ്കാര ശുശ്രൂഷയ്ക്കു മുന്പായി സംസ്ഥാന സർക്കാരിന്റെ ഔദ്യോഗിക ബഹുമതിയും കുഞ്ഞ് ആലിന് നൽകുന്നുണ്ട്.