തീക്കോയി: ആനിയിളപ്പ്-വെട്ടിപ്പറമ്പ്-പൂഞ്ഞാർ റോഡ് ഗതാഗതയോഗ്യമാക്കണമെന്ന് ആവശ്യപ്പെട്ട് യുഡിഎഫ് തീക്കോയി, പൂഞ്ഞാർ മണ്ഡലം കമ്മിറ്റികളുടെ ആഭിമുഖ്യത്തിൽ ആനിയിളപ്പ് ജംഗ്ഷനിൽ ജനകീയ ധർണ നടത്തി. ജൽ ജീവൻ മിഷൻ പദ്ധതിക്കുവേണ്ടി വെട്ടിപ്പൊളിച്ച റോഡ് രണ്ടു വർഷം കഴിഞ്ഞിട്ടും ഗതാഗതയോഗ്യമല്ലാതെ പ്രദേശവാസികൾ ദുരിതമനുഭവിക്കുകയാണ്.
പരാതികളും നിവേദനങ്ങളും നൽകിയിട്ടും അധികൃതർ അനാസ്ഥ തുടരുന്നതിൽ പ്രതിഷേധിച്ചാണ് യുഡിഎഫ് മണ്ഡലം കമ്മിറ്റികളുടെ നേതൃത്വത്തിൽ ധർണ നടത്തിയത്.
കെപിസിസി സെക്രട്ടറി ടോമി കല്ലാനി ധർണ ഉദ്ഘാടനം ചെയ്തു. യുഡിഎഫ് തീക്കോയി മണ്ഡലം ചെയർമാൻ ജോയി പൊട്ടനാനി അധ്യക്ഷത വഹിച്ചു. മണ്ഡലം പ്രസിഡന്റ് ഹരി മണ്ണുമഠം, ബ്ലോക്ക് പ്രസിഡന്റ് സതീഷ് കുമാർ, യുഡിഎഫ് നിയോജകമണ്ഡലം കൺവീനർ മജു പുളിക്കൻ, പി.എച്ച്. നൗഷാദ്, ബ്ലോക്ക് പഞ്ചായത്ത് മെംബർമാരായ റോജി മുതിരേന്തിക്കൽ, മോഹനൻ കുട്ടപ്പൻ, ഡിസിസി മെംബർമാരായ ജോർജ് സെബാസ്റ്റ്യൻ പുളിക്കക്കുന്നേൽ, പൂഞ്ഞാർ മാത്യു, യുഡിഎഫ് മണ്ഡലം കൺവീനർ പയസ് കവളംമാക്കൽ, വാർഡ് മെംബർമാരായ ജയറാണി തോമസുകുട്ടി, കൃപ ബിജു, പി. മുരുകൻ എന്നിവർ പ്രസംഗിച്ചു.