പെരിന്തൽമണ്ണ ജില്ലാ ആശുപത്രിയിലെ ഇഫ്താർ പാണക്കാട് സാദിഖലി ശിഹാബ് തങ്ങൾ ഉദ്ഘാടനം ചെയ്യുന്നു.
പെരിന്തൽമണ്ണ: റംസാൻ നോന്പ് കാലങ്ങളിൽ പെരിന്തൽമണ്ണ സിഎച്ച് സെന്റർ നടത്തിവരാറുള്ള പെരിന്തൽമണ്ണ ജില്ലാ ആശുപത്രി കേന്ദ്രീകരിച്ചുള്ള സൗജന്യ ഭക്ഷണ വിതരണത്തിന്റെ ഉദ്ഘാടനം പാണക്കാട് സാദിഖലി ശിഹാബ് തങ്ങൾ നിർവഹിച്ചു. ജില്ലാ ആശുപത്രിയിലെ രോഗികൾക്കും കൂട്ടിരിപ്പുകാർക്കും നോന്പ് ഇല്ലാത്തവർക്കും മൂന്ന് നേരങ്ങളിൽ നൽകുന്ന സൗജന്യ ഭക്ഷണ വിതരണമാണ് കഴിഞ്ഞ ദിവസം ആരംഭിച്ചത്. നോന്പുള്ളവർക്ക് ഇഫ്താറും പുലർച്ചെയുള്ള ഭക്ഷണവും നോന്പില്ലാത്തവർക്കുള്ള രാത്രിഭക്ഷണവും ഇനി 30 ദിവസങ്ങളിൽ നൽകും.
ഈ വർഷം സിഎച്ച് സെന്റർ കേന്ദ്രീകരിച്ച് ടൗണിലുള്ള ആളുകൾക്കും പ്രത്യേക ഇഫ്താറും സംഘടിപ്പിച്ചിട്ടുണ്ടെന്ന് തങ്ങൾ പറഞ്ഞു. പെരിന്തൽമണ്ണ ജില്ലാ ആശുപത്രിയിലെ ഡയാലിസിസ് രോഗികളുടെ ചെലവ് ഇനി മുതൽ ഡയാലിസിസ് യൂണിറ്റ് തുറക്കുന്നത് വരെ സിഎച്ച് സെന്റർ ഏറ്റെടുത്തത് വലിയ കാര്യമാണെന്നും ഭാരവാഹികളെ അഭിനന്ദിക്കുന്നതായും തങ്ങൾ പറഞ്ഞു.
ജനറൽ സെക്രട്ടറി എ.കെ. മുസ്തഫ, നജീബ് കാന്തപുരം എംഎൽഎ, പെരിന്തൽമണ്ണ ബ്ലോക്ക് പഞ്ചായത്ത് പ്രസിഡന്റ് നജ്മ തബ്ഷീറ, അഡ്വ. നാലകത്ത് സൂപ്പി, എ.കെ. നാസർ, എസ്. അബ്ദുസലാം, എം.എസ്. അലവി, തച്ചനാട്ടുകര റഷീദ് ആലായൻ തുടങ്ങിയവർ പങ്കെടുത്തു. ഡിസിസി ജനറൽ സെക്രട്ടറിയായി ചുമതലയേറ്റ എം.എം. സക്കീറിനെ സാദിഖലി തങ്ങൾ അഭിനന്ദിച്ചു.
Tags : Local News Nattuvishesham Malappuram