കുണ്ടറ : തെരഞ്ഞെടുപ്പുമുന്നിൽകണ്ട് സിപിഎം വിലകുറഞ്ഞ നാടകങ്ങൾ ആരംഭിച്ചുവെന്നു പി.സി.വിഷ്ണുനാഥ് എംഎൽഎ. കുണ്ടറയിലെ കശുവണ്ടി ഫാക്ടറിയില് തന്നെ തടയാന് ശ്രമിച്ചത് സിപിഎം ആസൂത്രണം ചെയ്ത ഒരു നാടകമാണെന്ന് എംഎല്എ കുറ്റപ്പെടുത്തി.
കൊറ്റംകര കശുവണ്ടി ഫാക്ടറിയില് തൊഴിലാളികള് തടഞ്ഞുവെന്ന് സിപിഎം പ്രചരിപ്പിച്ചതിനു മറുപടിയുമായാണ് എംഎല്എ തന്നെ രംഗത്ത് വന്നത്. തന്നെ തടഞ്ഞതു സിപിഎം പ്രവർത്തകയാണെന്നു വ്യക്തമായിരിക്കേ, കോൺഗ്രസ് പ്രവർത്തകയാണെന്നു ആരോപിച്ചു ഫെയ്സ് ബുക്കിലൂടെ നേതാക്കൾ കഥകൾ മെനയുകയാണ്. ഇവരുടെ മകൾ പഞ്ചായത്ത് തെരഞ്ഞെടുപ്പിൽ സിപിഎം സ്ഥാനാർഥിയായിരുന്നു.
മകനാണെങ്കിൽ ഡിവൈഎഫ്ഐ പ്രവർത്തകനും. തന്നോട് ചോദ്യം ചോദിക്കാൻ എത്തിയപ്പോൾ ഡിവൈഎഫ്ഐ നേതാക്കളും ഉണ്ടായിരുന്നു.അവരാണ് കാമറയിൽ പിടിച്ചതെന്നും വിഷ്ണുനാഥ് പറഞ്ഞു. കോണ്ഗ്രസുകാരിയായ തൊഴിലാളി എംഎല്എയെ തടഞ്ഞു എന്ന രീതിയില് സിപിഎം ജില്ലാ കമ്മിറ്റിയുടെയും പ്രമുഖ നേതാക്കളുടെയും ഫേസ്ബുക്ക് പേജുകളിലൂടെ വ്യാജ പ്രചാരണം നടത്തുകയാണെന്ന് അദ്ദേഹം കുറ്റപ്പെടുത്തി.
സംഭവത്തിന് ശേഷം താന് വീണ്ടും ഫാക്ടറിയില് ചെന്നപ്പോള്, മറ്റ് തൊഴിലാളികള് തന്നോട് സംസാരിച്ചുവെന്നും രാഷ്ട്രീയ പ്രേരിതമായി നടന്ന ആ സംഭവത്തില് അവര് ക്ഷമ ചോദിച്ചുവെന്നും എംഎല്എ പറഞ്ഞു.
Tags : Local News Nattuvishesham Kollam