തിരുവനന്തപുരം നഗരസഭയിലെ ഇടതു ദുർഭരണത്തിനെതിരെ കെ. മുരളീധരൻ നയിക്കുന്ന ജനകീയ വിചാരണാ യാത്രയ്ക്ക് വെങ്ങാനൂരിൽ നൽകിയ സ്വീകരണത്തിൽനിന്ന്.
കോവളം: തിരുവനന്തപുരം നഗരസഭയെ ബിജെപിക്ക് അടിയറവെക്കാനുള്ള ശ്രമമാണ് സിപിഎം നടത്തുന്നതെന്ന് കെപിസിസി മുൻ പ്രസിഡന്റ് കെ. മുരളീധരൻ. കേന്ദ്രവുമായി മുഖ്യമന്ത്രി നടത്തിയ രഹസ്യധാരണയുടെ അടിസ്ഥാനത്തിലാണ് ഈ നീക്കമെന്നും അശാസ്ത്രീയമായി നടത്തിയ വാർഡ് വിഭജനം ഇതിനു തെളിവാണെന്നും മുരളീധരൻ കൂട്ടിച്ചേർത്തു. നഗരസഭയിലെ ഇടതു ദുർഭരണത്തിനെതിരെ കെ. മുരളീധരൻ നയിക്കുന്ന ജനകീയ വിചാരണാ യാത്രയ്ക്ക് വിഴിഞ്ഞത്തു നൽകിയ സ്വീകരണത്തിൽ സംസാരിക്കുകയായിരുന്നു അദ്ദേഹം.
വെങ്ങാനൂർ, മുക്കോല, വിഴിഞ്ഞം ഹാർബർ, വെള്ളാർ, പൂങ്കുളം, പുഞ്ചക്കരി, തിരുവല്ലം തുടങ്ങിയ സ്ഥലങ്ങളിലും ജനകീയ വിചാരണാ യാത്രയ്ക്ക് സ്വീകരണം നൽകി. അഡ്വ. എം. വിൻസന്റ് എംഎൽഎ, കെപിസിസി ഭാരവാഹികളായ എം.എം. വാഹിദ്, കെ.എസ്. ശബരീനാഥൻ, ഗോപകുമാർ, ജോൺ വിനേഷ്യസ്, ബ്ലോക്ക് പ്രസിഡന്റുമാരായ കരുംകുളം വിജയകുമാർ, ഉച്ചക്കട സുരേഷ്, കെ.എം ഹാരിസ്, കോളിയൂർ ദിവാകരൻ നായർ, ചെമ്പഴന്തി അനിൽ, വിൻസന്റ് ഡി. പോൾ, വിനോദ് സെൻ തുടങ്ങിയവർ പങ്കെടുത്തു.
Tags : K. Muraleedharan Local News Thiruvananthapuram Nattuvishesham CPM