മികച്ച കവിതാസമാഹാരത്തിനുള്ള പുരസ്കാരം സ്റ്റെല്ല മാത്യുവിന്
കൽപ്പറ്റ: ജില്ലാ ലൈബ്രറി കൗണ്സിൽ 2025ലെ അക്ഷരപുരസ്കാരങ്ങൾ പ്രഖ്യാപിച്ചു. മികച്ച എഴുത്തുകാർക്കുള്ള പുരസ്കാരങ്ങൾ ഷീല ടോമി(കഥാസമാഹാരം-കിളിനോച്ചിയിലെ ശലഭങ്ങൾ), ഡോ. കെ. രമേശൻ(സാഹിത്യ നിരൂപണം-ബെന്യാമിൻ;പ്രത്യാശാമുനന്പിലെ എഴുത്തുകൾ), സി.വി. ജോയി(നോവൽ-പക്ഷിക്കൂടുകളുടെ മ്യൂസിയം), സ്റ്റെല്ല മാത്യു(കവിതാസമാഹാരം-ഒരാൾക്കുള്ള മൂന്ന് ചായകൾ)എന്നിവർ നേടി.
ജില്ലാ ലൈബ്രറി കൗണ്സിൽ പ്രസിഡന്റ് പി.കെ. സത്താർ, വൈത്തിരി താലൂക്ക് സെക്രട്ടറി സി.എം. സുമേഷ്, ജോയിന്റ് സെക്രട്ടറി ഡോ. ജിതിൻ കണ്ടോത്ത്, സംസ്ഥാന സമിതിയംഗം പി. ശിവദാസ് എന്നിവർ വാർത്താസമ്മേളനത്തിലാണ് പുരസ്കാരങ്ങൾ പ്രഖ്യാപിച്ചത്.
ജില്ലയിലെ മികച്ച ഗ്രന്ഥശാലയ്ക്കുള്ള പി. പോക്കർ സ്മാരക പുരസ്കാരത്തിന് മാനന്തവാടി പൂളയ്ക്കൽ ഗോത്രദീപം ആദിവാസി ഗ്രന്ഥാലയത്തെ തെരഞ്ഞെടുത്തതായി അവർ അറിയിച്ചു.
പാപ്ലശേരി ഇ.കെ. നായനാർ വായനശാലയാണ് ബത്തേരി താലൂക്കിലെ മികച്ച ഗ്രന്ഥശാല. വൈത്തിരി താലൂക്കിലെ മികച്ച ഗ്രന്ഥാലയമായി വണ്ടിയാന്പറ്റ യുവശബ്ദം ഗ്രന്ഥാലയത്തെ തെരഞ്ഞെടുത്തു. വെള്ളമുണ്ട വിജ്ഞാൻ ലൈബ്രറിയാണ് മാനന്തവാടി താലൂക്കിലെ മികച്ച ഗ്രന്ഥശാല. ജില്ലയിലെ മികച്ച ലൈബ്രേറിയനുള്ള എം. ബാലഗോപാൽ സ്മാരക പുരസ്കാരത്തിന് മാണ്ടാട് ഗ്രാമോദയം ക്ലബ് ആൻഡ് ലൈബ്രറിയിലെ പി.എം. യെൽദോയെ തെരഞ്ഞെടുത്തു.
മാനന്തവാടി പഴശി സ്മാരക ഗ്രന്ഥാലയത്തിലെ വി.പി. ഷിനോജാണ് മാനന്തവാടി താലൂക്കിലെ മികച്ച ലൈബ്രേറിയൻ. ബത്തേരി താലൂക്കിലെ മികച്ച ലൈബ്രേറിയനായി പുൽപ്പള്ളി ചണ്ണോത്തുകൊല്ലി ജൂലി ലൈബ്രറിയിലെ കെ.ജെ. തോമസിനെയും വൈത്തിരി താലൂക്കിലെ മികച്ച ലൈബ്രേറിയനായി പാറത്തോട് ഭാവചിത്ര ഗ്രന്ഥശാലയിലെ ജാസ്മിൻ ലിജോയെയും തെരഞ്ഞെടുത്തു. പുരസ്കാരങ്ങൾ 17ന് ഉച്ചകഴിഞ്ഞ് മുട്ടിൽ എംആർ ഓഡിറ്റോറിയത്തിൽ 17ന് ഉച്ചകഴിഞ്ഞ് രണ്ടിന് നടത്തുന്ന സാംസ്കാരിക സംഗമത്തിൽ വിതരണം ചെയ്യും.
സംഗമം ഉദ്ഘാടനം ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ നിർവഹിക്കും. മുട്ടിൽ പഞ്ചായത്ത് പ്രസിഡന്റ് സി.പി. രഞ്ജിത്ത് മുഖ്യാതിഥിയാകും. "കേരളം: എഴുത്ത്, വായന, പ്രതിരോധം’ എന്ന വിഷയത്തിൽ സെമിനാർ നടത്തും. ഡോ. പി.കെ. ഗോപൻ വിഷയം അവതരിപ്പിക്കും. ജില്ലയിൽ ലൈബ്രറി കൗണ്സിലിനു കീഴിൽ 268 ഗ്രാമീണ ഗ്രന്ഥശാലകളുണ്ട്. ഇതിൽ 36 എണ്ണം പട്ടികവർഗ ഗ്രന്ഥാലയങ്ങളാണ്. കുറഞ്ഞത് 1,000 പുസ്തകങ്ങളും കെട്ടിട സൗകര്യവും ഒരു വർഷം പഴക്കവുമുള്ള ഗ്രന്ഥാലയങ്ങൾക്കാണ് കൗണ്സിൽ അഫിലിയേഷൻ നൽകുന്നത്. ജില്ലയിലെ മൂന്ന് താലൂക്കുകളിലും 2030 ഓടെ 150 വീതം ലൈബ്രറികൾ എന്ന ലക്ഷ്യത്തോടെയാണ് കൗണ്സിൽ പ്രവർത്തനമെന്ന് ഭാരവാഹികൾ പറഞ്ഞു.
Tags : Local News Nattuvishesham Wayanad