കണ്ണൂർ: ഹാൾ ടിക്കറ്റ് തയാറാക്കി നൽകിയതിലെ തെറ്റിനെത്തുടർന്ന് നിരവധി വിദ്യാർഥികൾക്ക് പരീക്ഷയെഴുതാനായില്ല. അമൃത വിശ്വവിദ്യാപീഠം യൂണിവേഴ്സിറ്റിയുടെ എൻജിനിയറിംഗ് പ്രവേശ പരീക്ഷ എഴുതാനെത്തിയവരാണ് ദുരിതത്തിലായത്. പയ്യന്നൂർ കോറോം എസ്എൻജി കോളജായിരുന്നു പരീക്ഷാകേന്ദ്രം.
എന്നാൽ 45 ഓളം വിദ്യാർഥികൾക്ക് ലഭിച്ച ഹാൾ ടിക്കറ്റിൽ പരീക്ഷാ കേന്ദ്രം കണ്ണൂർ എസ്എൻ കോളജ് എന്നാണ് രേഖപ്പെടുത്തിയത്. ഇതു പ്രകാരം ഇന്നലെ രാവിലെ തോട്ടടയിലെ കണ്ണൂർ എസ്എൻ കോളജിൽ എത്തിയ വിദ്യാർഥികളോട് കോളജിൽ ഇത്തരമൊരു പരീക്ഷ നടക്കുന്നില്ലെന്ന് അധികൃതർ അറിയിക്കുകയായിരുന്നു.
എസ്എൻ കോളജ് അധികൃതർ കോറോത്തെ എസ്എൻജി കോളജുമായി ബന്ധപ്പെട്ടതോടെയാണ് ഹാൾ ടിക്കറ്റ് തയാറാക്കിയതിലെ അബദ്ധം വ്യക്തമാകുന്നത്. കോളജ് മാറി എത്തിയതു കാരണം ഇന്നലെയും ഇന്നും മൂന്നു സമയങ്ങളിലായി നടക്കുന്ന പരീക്ഷയുടെ ആദ്യ ബാച്ചുകാർക്ക് പരീക്ഷയെഴുതാനായില്ല. ഇതിനിടെ വിദ്യാർഥികളും രക്ഷിതാക്കളും അമൃത വിശ്വപീഠം യൂണിവേഴ്സിറ്റിയുമായി ബന്ധപ്പെട്ടതോടെയാണ് യൂണിവേഴ്സിറ്റി അധികൃതർ ഹാൾ ടിക്കറ്റിലെ പാളിച്ച മനസിലാക്കുന്നത്. ഹാൾ ടിക്കറ്റിലെ തെറ്റുകാരണം പരീക്ഷയെഴുതാനാകാത്തവർക്ക് അവസരം നൽകുമെന്ന് യൂണിവേഴ്സിറ്റി അധികൃതർ ഉറപ്പ് നൽകിയിട്ടുണ്ട്.
Tags : nattu vishesham Exam center changed