അട്ടപ്പാടി ഗോത്രവർഗ ഉന്നതികളിൽ ഭക്ഷ്യ കമ്മീഷൻ ചെയർമാൻ ഡോ. ജിനു സഖറിയ സന്ദർശനം നടത്തുന്നു.
പാലക്കാട്: ദേശീയ ഭക്ഷ്യഭദ്രതാ നിയമം പ്രകാരം വിവിധ വകുപ്പുകൾ നടപ്പാക്കുന്ന പദ്ധതികളുടെ പുരോഗതി വിലയിരുത്തുന്നതിനായി സംസ്ഥാന ഭക്ഷ്യ കമ്മീഷൻ അട്ടപ്പാടിയിലെ ഗോത്രവർഗമേഖലകളിൽ സന്ദർശനം നടത്തി.
കമ്മീഷൻ ചെയർമാൻ ഡോ.ജിനു സഖറിയ ഉമ്മന്റെ നേതൃത്വത്തിൽ തേക്കുപന, ദൊഡുഗട്ടി എന്നീ ഊരുകളിലാണ് കഴിഞ്ഞദിവസം സന്ദർശനം നടത്തിയത്. റേഷൻ ഗുണഭോക്താക്കളെ നേരിൽകണ്ട കമ്മീഷൻ പദ്ധതികളുടെ ആനുകൂല്യം കൃത്യമായി ലഭിക്കുന്നുണ്ടെന്ന് ഉറപ്പുവരുത്തി. തേക്കുപന, ദൊഡുഗട്ടി മേഖലകളിൽ സഞ്ചരിക്കുന്ന റേഷൻ കടയുടെ സേവനം ലഭ്യമാക്കുമെന്നും ഊരുകളിലുള്ളവർക്ക് ഗോതന്പിനു പകരം ആട്ട നൽകാൻ നടപടി സ്വീകരിക്കുമെന്നും കമ്മീഷൻ അറിയിച്ചു.
കമ്മീഷൻ അംഗങ്ങളായ ഷീല വിജയകുമാർ, മുരുകേഷ് ചെറുനാലി, മെംബർ സെക്രട്ടറി ബിജു ശങ്കർ, ജില്ലാ സപ്ലൈ ഓഫീസർ എ.എസ്. ബീന, ഐസിഡിഎസ് പ്രോഗ്രാം ഓഫീസർ ടി.വി. മിനിമോൾ എന്നിവരും വിവിധ വകുപ്പ് ഉദ്യോഗസ്ഥരും സന്ദർശന സംഘത്തിലുണ്ടായിരുന്നു.
Tags : Attappadi nattuvishesham local news