ഫ്രഷ്കട്ട് വിരുദ്ധ ജനകീയ സമരപന്തലില് നിരാഹാരം അനുഷ്ഠിക്കുന്ന അഡ്വ. ബിജു കണ്ണന്തറയെ നജീബ് കാന്തപുരം എംഎല്എ സന്ദര്ശിക്കുന്നു.
താമരശേരി: അമ്പായത്തോട്ടിലെ ഫ്രഷ്കട്ട് കോഴി മാലിന്യ സംസ്കരണ പ്ലാന്റിന്റെ പ്രവര്ത്തനം ഈ പ്രദേശത്തെ ജനങ്ങള് നേരിടുന്ന ഗുരുതരമായ മനുഷ്യാവകാശ പ്രശ്നമാണെന്ന നിലയില് സര്ക്കാര് വിഷയത്തില് അതീവ ഗൗരവത്തോടെ ഇടപെടണമെന്ന് നജീബ് കാന്തപുരം എംഎല്എ ആവശ്യപ്പെട്ടു.
ജനങ്ങള് നടത്തുന്ന ജനകീയ സമരത്തിന് ഐക്യദാര്ഢ്യം പ്രകടിപ്പിച്ചു കട്ടിപ്പാറ പഞ്ചായത്ത് മുന് പ്രസിഡന്റും കര്ഷക കോണ്ഗ്രസ് ജില്ലാ പ്രസിഡന്റുമായ അഡ്വ. ബിജു കണ്ണന്തറ നടത്തുന്ന നിരാഹാര സമര പന്തല് സന്ദര്ശിച്ച് സംസാരിക്കുകയായിരുന്നു അദ്ദേഹം.
നിയമങ്ങള് കാറ്റില്പ്പറത്തി ഒരു നാടിനെ ഒന്നടങ്കം ദുരിതത്തിലാക്കിയും വെല്ലുവിളിച്ചും പ്രവര്ത്തിക്കുന്ന സ്ഥാപനത്തിന് ഉദ്യോഗസ്ഥരും-പോലീസും ഒത്താശ ചെയ്യുന്നു എന്നത് അംഗീകരിക്കാനാവില്ല.
ഇത്തരം ഉദ്യോഗസ്ഥരെ കണ്ടെത്തി നിലക്കു നിര്ത്താന് സര്ക്കാര് തയാറാവണം. പിറന്ന മണ്ണില് ജീവിക്കാന് വേണ്ടി ഒരു നാട് ഒന്നടങ്കം സമരം ചെയ്യുകയാണ്. ഇത് കണ്ടില്ലെന്ന് നടിക്കുന്ന സര്ക്കാര് ആരുടെ പക്ഷത്താണെന്ന് മുഖ്യമന്ത്രി വ്യക്തമാക്കണമെന്നും അദ്ദേഹം പറഞ്ഞു.
Tags : Najeeb Kanthapuram MLA Local News Kozhikode Nattuvishesham