ഹെൽത്തി കേരള കാന്പയിന്റെ ഭാഗമായി "ആയുഷ് കേരള'യുടെ നേതൃത്വത്തിൽ മലപ്പുറം കോട്ടക്കുന്നിൽ നടന്ന യോഗ ക്ലബുകളുടെ പ്രദർശനം.
മലപ്പുറം: രോഗപ്രതിരോധത്തിന്റെ സന്ദേശം നൽകി ആയുഷ് വകുപ്പും നാഷണൽ ആയുഷ് മിഷനും സംയുക്തമായി നടത്തുന്ന "ഹെൽത്തി കേരള ’ പ്രചാരണ പ്രവർത്തനങ്ങൾക്ക് ജില്ലയിൽ തുടക്കം കുറിച്ചു. മലപ്പുറം സിവിൽ സ്റ്റേഷനിൽ നടന്ന പരിപാടിയിൽ നഗരസഭാ ചെയർപേഴ്സണ് വി. റിനിഷ ഉദ്ഘാടനം നിർവഹിച്ചു.
രോഗങ്ങളെക്കുറിച്ച് ബോധവത്കരണം നടത്തുക, പ്രതിരോധ പ്രവർത്തനങ്ങൾ ഉൗർജിതപ്പെടുത്തുക, നല്ല ഭക്ഷണം, വ്യായാമം പ്രോത്സാഹിപ്പിക്കുക എന്നിവയാണ് കാന്പയിൻ ലക്ഷ്യമിടുന്നത്. ഐഎസ്എം ഡിഎംഒ ഡോ. റോയി ജോസഫ് അധ്യക്ഷത വഹിച്ചു. ജില്ലാ പ്രോഗ്രാം മാനേജർ ഡോ. സിമി മുരളി, ഹോമിയോ ഡിഎംഒ ഡോ. ജുമൈലത്ത്, ഡോ. നസീല, എ.കെ. അഷ്റഫ് എന്നിവർ പ്രസംഗിച്ചു. കാന്പയിന്റെ ഭാഗമായി കോട്ടക്കുന്നിൽ യോഗ പ്രദർശനം നടത്തി. കളക്ടർ വി.ആർ. വിനോദ് മുഖ്യാതിഥിയായിരുന്നു.
കാന്പയിന്റെ ഭാഗമായി സിവിൽ സ്റ്റേഷനിൽ നടത്തിയ പ്രദർശനം ജനങ്ങൾക്ക് ഏറെ ഉപകാരപ്രദമായി. ജീവിത ശൈലി രോഗത്തെക്കുറിച്ചും പ്രതിരോധ മാർഗങ്ങളെ സംബന്ധിച്ചും അറിവ് നൽകുന്നതായിരുന്നു പ്രദർശനം. സൗജന്യ മെഡിക്കൽ ക്യാന്പും ഇതോടൊപ്പം ഒരുക്കിയിരുന്നു.
രോഗനിർണയത്തോടൊപ്പം മരുന്നും സൗജന്യമായി വിതരണം ചെയ്തു. ആരോഗ്യകരമായ ഭക്ഷണരീതി പരിചയപ്പെടുത്തുന്ന സ്റ്റാളും പ്രദർശനത്തിലുണ്ടായിരുന്നു. ഭക്ഷണരീതി അറിയാനും രുചിച്ച് നോക്കാനും പാചകരീതി മനസിലാക്കാനും സാധിക്കുന്ന രീതിയിലാണ് സ്റ്റാൾ ഒരുക്കിയിരുന്നത്.
Tags : Local News Nattuvishesham Malappuram