നെടുമങ്ങാട്: 50 പവനും 50,000 രൂപയുമായി കുളപ്പട സുവർണ നഗർ സ്വദേശി കെ. മോഹനനെ (62) കാണാതായ സംഭവത്തിൽ കൈംബ്രാഞ്ച് കരകുളം പാലത്തിന് സമീപം അന്വേഷണം ആരംഭിച്ചു.
ഇന്നലെ രാവിലെ കിള്ളിയാറിൽ മണ്ണുമാന്തി യന്ത്രം ഉപയോഗിച്ച് പരിശോധന നടത്തി. അന്വേഷണത്തിൽ ഒരു തെളിവും കണ്ടെത്താനായില്ല. ഇവിടെനിന്നും ഒരു സ്കൂട്ടർ കണ്ടെത്തിയ സാഹചര്യത്തിലാണു പരിശോധന നടത്തിയത്. എന്നാൽ ഇൗ സ്കൂട്ടർ മോഹനന്റേതല്ലെന്നു കണ്ടെത്തുകയാ യിരുന്നു.
2020 മേയ് എട്ടിനാണ് പേരൂർക്കട സർവീസ് സഹകരണ ബാങ്കിൽ നിന്നെടുത്ത 50 പവനും അരലക്ഷം രൂപയുമായി സ്വകാര്യധനകാര്യ സ്ഥാപനത്തിലേക്കു പുറപ്പെട്ട മോഹനനെ കരകുളത്ത് വച്ചു കാണാതായത്.
കരകുളം പഞ്ചായത്ത് ഒാഫീസിനു സമീപത്തെ സിസിടിവിയിൽ ദൃശ്യം കണ്ടെത്തിയെങ്കിലും ഇതിനുശേഷം മോഹനൻ എവിടെ എന്നത് ഇന്നും അഞ്ജാതമാണ്. ലോക്കൽ പോലീസിന്റെ അന്വേഷണത്തിൽ ഒരു തെളിവും കണ്ടെത്താവാനായതോടെയാണ് ക്രൈംബ്രാഞ്ച് അന്വേഷണം ഏറ്റെടുത്തത്.