ചേര്ത്തല: സംസ്ഥാനത്തെ സര്ക്കാര്, എയ്ഡഡ് സ്കൂളുകളിലെ കയികാധ്യാപകരുടെ സംയുക്ത സംഘടന സംസ്ഥാന സമ്മേളനം 12 മുതല് 14 വരെ ചേര്ത്തല താലൂക്ക് എന്എസ്എസ് യൂണിയന് ഹാളില് നടക്കും. ആരോഗ്യ കായിക വിദ്യാഭ്യാസം നിര്ബന്ധ പാഠ്യവിഷയമാക്കുക, ഹയര്സെക്കന്ഡറി ക്ലാസുകളില് കായികാധ്യാപക തസ്തിക അനുവദിക്കുക തുടങ്ങിയ 11 പ്രമേയങ്ങളാണ് സംസ്ഥാന സമ്മേളനം സര്ക്കാരിനു മുന്നില് സമര്പ്പിക്കുന്നത്.
സംസ്ഥാനത്തെ 14 ജില്ലകളില്നിന്നുള്ള ആയിരത്തോളം കായികാധ്യാപകര് സമ്മേളനത്തില് പങ്കെടുക്കുമെന്ന് സംയുക്താ കായികാധ്യാപക സംഘടന ചെയര്മാന് ബിജു ദിവാകരന്, സംസ്ഥാന സമ്മേളനം ചെയര്മാന് വി. ഷാജി, സ്വാഗതസംഘം കണ്വീനര് ടി.പി. മനേഷ്കുമാര്, സംഘടന പ്രസിഡന്റ് കെ.ആര്. വിനയകുമാര് എന്നിവര് പത്രസമ്മേളനത്തില് അറിയിച്ചു.
12ന് വൈകിട്ട് 4.30ന് പ്രതിനിധി സമ്മേളനം. 13ന് രാവിലെ 10.30ന് നടക്കുന്ന പൊതുസമ്മേളനം ജില്ലാപഞ്ചാത്ത് പ്രസിഡന്റ് എ. മഹേന്ദ്രന് ഉദ്ഘാടനം ചെയ്യും. ജില്ലാ പഞ്ചായത്ത് വിദ്യാഭ്യാസ സ്റ്റാന്ഡിംഗ് കമ്മിറ്റി ചെയര്മാന് എസ്. രാധാകൃഷ്ണന് മികച്ച കായികാധ്യാപകരെ ആദരിക്കും. രണ്ടിന് കായിക വിദ്യാഭ്യാസ സെമിനാര് മഹാത്മാഗാന്ധി സര്വകലാശാല ഫിസിക്കല് എഡ്യുക്കേഷന് ഡയറക്ടര് ഡോ. ബിനുജോര്ജ് വര്ഗീസ് ഉദ്ഘാടനം ചെയ്യും.
പാലാ സെന്റ് തോമസ് അസോസിയേറ്റ് പ്രഫസര് ഡോ. ആഷിഷ് ജോസഫ് വിഷയം അവതരിപ്പിക്കും. വൈകുന്നേരം 3.30നു നടക്കുന്ന യാത്രയയപ്പു സമ്മേളനം സംസ്ഥാന പിന്നാക്ക വികസന കോര്പറേഷന് ചെയര്മാന് കെ. പ്രസാദ് ഉദ്ഘാടനം ചെയ്യും. ചേര്ത്തല നഗരസഭാ ചെയര്മാന് എസ്. സോബിന് ഉപഹാരം സമര്പ്പിക്കും. 14ന് രാവിലെ പത്തിന് സംസ്ഥാന ജനറല് കൗണ്സില്യോഗം.