അടൂര് നെല്ലിമൂട്ടില്പടിയില് നിയന്ത്രണംവിട്ട കെഎസ്ആര്ടിസി ബസ് കടയുടെ മുന്നിലേക്ക് ഇടിച്ചു കയറിയപ്പോൾ.
അടൂർ: എംസി റോഡില് നെല്ലിമൂട്ടില്പടി ജംഗ്ഷനില് കെഎസ്ആര്ടിസി സൂപ്പര് ഫാസ്റ്റ് ബസ് നിയന്ത്രണംവിട്ട് കെഎസ്ആര്ടിസി ഓര്ഡിനറി ബസില് തട്ടിയ ശേഷം സമീപത്തെ കടയുടെ മുന്നിലേക്ക് ഇടിച്ച് കയറി. ഇന്നലെ പുലര്ച്ചെ 5.25 നാണ് അപകടം. കോട്ടയത്തു നിന്നും തിരുവനന്തപുരത്തേക്ക് പോയ കോട്ടയം ഡിപ്പോയിലെ സൂപ്പര് ഫാസ്റ്റ് ബസാണ് അപകടത്തില്പ്പെട്ടത്.
സൂപ്പര്ഫാസ്റ്റ് ബസ് നിയന്ത്രണം വിട്ട് സിഗ്നല് പോയിന്റില് വച്ച് ചവറ ഭാഗത്തേക്കു തിരിഞ്ഞ കൊല്ലം ഓര്ഡിനറി ബസില് തട്ടിയശേഷം ഫുട്പാത്തിലെ ഡിവൈഡറും തകര്ത്ത് സമീപത്തെ കടയുടെ മുന്വശത്ത് ഇടിച്ചു കയറകയായിരുന്നു. ഇവിടെ ഉണ്ടായിരുന്ന സിഗ്നല് പോസ്റ്റും തകര്ത്ത ശേഷം വ്യാപാര സ്ഥാപനത്തിന്റെ ഇരുമ്പ് വേലിയില് ഇടിച്ചാണ് നിന്നത്.
ബസിന്റെ മുന്വശം തകര്ന്നു.സംഭവത്തില് അടൂര് ഡിപ്പോയിലെ ഓര്ഡിനറി ബസ് ഡ്രൈവര് ആർ. രതീഷിന് നിസാര പരിക്കേറ്റു. പുലര്ച്ചെ റോഡില് തിരക്ക് കുറവായതിനാല് വലിയ അപകടം ഒഴിവായി.