പാലാ: കേരള കോണ്ഗ്രസ്-എം ചെയര്മാന് ജോസ് കെ. മാണി നയിക്കുന്ന വികസന സന്ദേശയാത്രയ്ക്ക് നാളെ രാവിലെ പത്തിന് പാലാ കുരിശുപള്ളിക്കവലയില് സ്വീകരണം നല്കുമെന്ന് എല്ഡിഎഫ് നേതാക്കള് പത്രസമ്മേളനത്തില് അറിയിച്ചു.
നിയോജകമണ്ഡലത്തിലെ പൗരപ്രമുഖർ, തൊഴിലാളികള്, കൃഷിക്കാര് ഉള്പ്പെടെയുള്ള വ്യക്തികളുമായി രാവിലെ 8.30 മുതല് 9.30 വരെ സണ്സ്റ്റാര് ഓഡിറ്റോറിയത്തില് സംവദിക്കും.
പാലാ കുരിശുപള്ളിക്കവലയില്നിന്നു ജാഥാ ക്യാപ്റ്റനെയും നേതാക്കളെയും സ്വീകരിക്കും. പാലാ മഹാറാണി തിയറ്റര് ഗ്രൗണ്ടില് പ്രത്യേകം തയാറാക്കിയ പന്തലില് നടക്കുന്ന സമ്മേളനത്തില് മന്ത്രി വി.എന്. വാസവന്, റോഷി അഗസ്റ്റിന്, കക്ഷിനേതാക്കള് തുടങ്ങിയവർ പങ്കെടുക്കും.
പത്രസമ്മേളനത്തില് സംഘാടകസമിതി ഭാരവാഹികളായ ലാലിച്ചന് ജോര്ജ്, ബാബു കെ. ജോര്ജ്, ടോബിന് കെ. അലക്സ്, സജേഷ് ശശി എന്നിവര് പങ്കെടുത്തു.