ട്രുറയുടെ നേതൃത്വത്തിൽ തൃപ്പൂണിത്തുറയിൽ നടന്ന വികസന മുരടിപ്പിനെതിരെയുള്ള ജനസദസ് കെ. ബാബു എംഎൽഎ ഉദ്ഘാടനം ചെയ്യുന്നു.
തൃപ്പൂണിത്തുറ: എസ്എൻ ജംഗ്ഷൻ - പൂത്തോട്ട റോഡ് വികസനവും കണിയാമ്പുഴ റോഡ് വികസനവും അനിശ്ചിതമായി നീളുമെന്ന് കെ. ബാബു എംഎൽഎ. ട്രുറയുടെ നേതൃത്വത്തിൽ നടന്ന വികസന മുരടിപ്പിനെതിരെയുള്ള ജനസദസ് ഉദ്ഘാടനം ചെയ്തുകൊണ്ടാണ് എംഎൽഎ ഇക്കാര്യമറിയിച്ചത്.
റോഡ് വികസനത്തിനായുള്ള നടപടികൾ പ്രായോഗിക തലത്തിലേക്കെത്താൻ ഇനിയും കടമ്പകളേറെയുണ്ടെന്ന സൂചനയാണ് എംഎൽഎ നടത്തിയതെങ്കിലും റോഡ് വികസനം കാത്തിരിക്കുന്ന പ്രദേശവാസികളെ നിരാശരാക്കുന്നതായി മാറി ജനസദസിൽ നിന്നുയർന്ന പ്രസ്താവന. റോഡ് വികസനത്തിനായി നിലവിലെ റോഡിനിരുവശവുമുള്ള സ്ഥലങ്ങൾ മൂന്ന് പതിറ്റാണ്ട് കാലത്തിലധികമായി മരവിപ്പിച്ചിട്ടിരിക്കുകയാണ്.
അതേസമയം മാമല ബണ്ട് റോഡ് ടെൻഡർ ചെയ്യാവുന്ന അവസ്ഥയിലേക്ക് എത്തിയെന്ന് അനൂപ് ജേക്കബ് എംഎൽഎ മുഖ്യപ്രഭാഷണം നടത്തിക്കൊണ്ട് അറിയിച്ചു. ട്രുറ ചെയർമാൻ വി.പി. പ്രസാദ് അധ്യക്ഷത വഹിച്ചു. നഗരസഭാധ്യക്ഷൻ പി.എൽ. ബാബു, ട്രുറ കൺവീനർ വി.സി.ജയേന്ദ്രൻ, പി.എസ്. ഇന്ദിര, ജിജി വെണ്ട്രപ്പിള്ളിൽ തുടങ്ങിയവർ പ്രസംഗിച്ചു.
മെട്രോയോടനുബന്ധിച്ച് ബസ് ടെർമിനൽ, മിൽമ മുതൽ ഹിൽപാലസ് റോഡ് വരെ നാലുവരിപ്പാത, ഇരുമ്പു പാലം, സീപോർട്ട്-എയർപോർട്ട് റോഡ് വികസനം, കരിങ്ങാച്ചിറ-തിരുവാങ്കുളം റോഡ് വികസനം, ചമ്പക്കര-പെരീക്കാട് പാലം യാഥാർഥ്യമാക്കുക തുടങ്ങിയ വികസന പദ്ധതികൾ സമയബന്ധിതമായി പൂർത്തിയാക്കണമെന്നാവശ്യപ്പെട്ടായിരുന്നു ജനസദസ്.
Tags : Local News Nattuvishesham Ernakulam