മൂവാറ്റുപുഴ രൂപതയുടെ ആഭിമുഖ്യത്തിൽ നടത്തുന്ന ഏഴാമത് മൂവാറ്റുപുഴ ബൈബിൾ കൺവൻഷനിൽ ഫാ.ഡാനിയേൽ പൂവ്വണ്ണത്തിൽ വചന പ്രഘോഷണം നടത്തുന്നു.
മൂവാറ്റുപുഴ: മൂവാറ്റുപുഴ രൂപതയുടെ ആഭിമുഖ്യത്തിൽ വാഴപ്പിള്ളി വിമലഗിരി ബിഷപ്സ് ഹൗസിനു സമീപം മാർ ഈവാനിയോസ് നഗറിൽ മൂന്ന് ദിവസമായി നടന്നുവരുന്ന ഏഴാമത് മൂവാറ്റുപുഴ ബൈബിൾ കൺവൻ ഇന്ന് സമാപിക്കും. ഇന്നലെ തിരുവനന്തപുരം മൗണ്ട് കാർമൽ ധ്യാനകേന്ദ്രം ഡയറക്ടർ ഫാ. ഡാനിയേൽ പൂവ്വണ്ണത്തിലിന്റെ നേതൃത്വത്തിൽ വചന പ്രഘോഷണം നടന്നു. ആത്മാവിലെ വെളിപ്പെടുത്തൽ മനസിലാക്കാൻ കഴിയാത്തവർക്ക് നിത്യ ജീവനേക്കുറിച്ച് അറിവു ലഭിക്കില്ലെന്ന് ഫാ. ഡാനിയേൽ വ്വണ്ണത്തിൽ പറഞ്ഞു.
കൺവൻഷനോടനുബന്ധിച്ച് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ മുഖ്യകാർമികനായും ഫാ. മാനുവൽ പിച്ചളക്കാട്ട്, ഫാ.അഗസ്റ്റിൻ നിരപ്പേൽ എന്നിവർ സഹകാർമികരായും സീറോ മലബാർ ക്രമത്തിൽ കുർബാന അർപ്പിച്ചു. മൂവാറ്റുപുഴ ബൈബിൾ കൺവൻഷൻ ദേശത്തിന് അനുഗ്രഹമാണെന്ന് ബിഷപ് അഭിപ്രായപ്പെട്ടു. വലിയ നോമ്പുകാലത്ത് അനുരഞ്ജനത്തിനും ആത്മസൗഖ്യത്തിനും കൺവൻഷൻ അവസരമൊരുക്കുകയാണെന്നും ബിഷപ് പറഞ്ഞു.
ബൈബിൾ കൺവൻഷനോടനുബന്ധിച്ച് ഇന്നലെ ഉച്ചകഴിഞ്ഞ് മാതൃസമാജം, സുവിശേഷ സംഘം അംഗങ്ങൾക്കായി കൂദാശ പഠന ക്ലാസ് നടത്തി. ഫാ.സജി അറയ്ക്കൽ ക്ലാസ് നയിച്ചു. സമാപന ദിവസമായ ഇന്ന് മലങ്കര കാത്തലിക് അസോസിയേഷൻ രൂപത സമിതിയുടെ ആഭിമുഖ്യത്തിൽ ഉച്ചകഴിഞ്ഞ് രണ്ടു മുതൽ നടക്കുന്ന എക്യുമെനിക്കൽ സമ്മേളനം മലങ്കര ഓർത്തഡോക്സ് സുറിയാനി സഭ കണ്ടനാട് ഈസ്റ്റ് മെത്രാപ്പോലീത്ത തോമസ് മാർ അത്തനാസിയോസ് ഉദ്ഘാടനം ചെയ്യും.
ബിഷപ് യൂഹാനോൻ മാർ തെയഡോഷ്യസ് സമ്മേളനത്തിൽ അധ്യക്ഷത വഹിക്കും. കിഡ്നി ഫെഡറേഷൻ ഓഫ് ഇന്ത്യ ചെയർമാൻ ഫാ. ഡേവീസ് ചിറമേൽ മുഖ്യപ്രഭാഷണം നടത്തും. വിവിധ ക്രൈസ്തവസഭാ പ്രതിനിധികൾ ഐക്യസന്ദേശം നൽകും. വൈകുന്നേരം 4.30 ന് മൂവാറ്റുപുഴ ബിഷപ് ഡോ. യൂഹാനോൻ മാർ തെയഡോഷ്യസ് മലങ്കര ക്രമത്തിൽ കുർബാന അർപ്പിക്കും. തുടർന്ന് ഒന്പത് വരെ ഫാ. ഡാനിയേൽ പൂവ്വണ്ണത്തിൽ വചന പ്രഘോഷണം നടത്തും.
Tags : Local News Nattuvishesham Ernakulam