ഇരിങ്ങാലക്കുട സെന്റ് മേരീസ് ഹയര്സെക്കന്ഡറി സ്കൂളിന്റെ രജതജൂബിലി ആഘോഷങ്ങളുടെ സമാപന സമ്മേളനം ബിഷപ് മാര് പോളി കണ്ണൂക്കാടന് ഉദാഘാടനം ചെയ്യുന്നു.
ഇരിങ്ങാലക്കുട: ഗുണമേന്മയുള്ള വിദ്യാഭ്യാസം നല്കലാണ് ക്രൈസ്തവസ്ഥാപനങ്ങളുടെ മുഖമുദ്രയെന്നും പാവപ്പെട്ടവനും പണക്കാരനും എന്ന വിത്യാസമില്ലാതെ ജാതി മത ഭേദമില്ലാതെ എല്ലാവര്ക്കും ഗുണമേന്മയുള്ള വിദ്യാഭ്യാസം നല്കലാണ് വിദ്യാഭ്യാസ രംഗത്ത് ക്രൈസ്തവ സഭയുടെ ലക്ഷ്യമെന്ന് ബിഷപ് മാര് പോളി കണ്ണൂക്കാടന് അഭിപ്രായപ്പെട്ടു.
ഇരിങ്ങാലക്കുട സെന്റ് മേരീസ് ഹയര് സെക്കന്ഡറി സ്കൂളിന്റെ രജതജൂബിലി ആഘോഷങ്ങളുടെ സമാപന സമ്മേളനം ഉദ്ഘാടനം ചെയ്ത പ്രസംഗിക്കുകയായിരുന്നു അദ്ദേഹം. കേരളത്തില് നവോത്ഥാനത്തിന് തുടക്കം കുറിച്ചതും, സംസ്കൃത വിദ്യാഭ്യാസം എല്ലാ ജാതിക്കാര്ക്കും പഠിക്കാന് അവസരം നല്കിയതും, ഉച്ചക്കത്തി വിതരണം സ്കൂളുകളില് ആദ്യമായി തുടങ്ങിയതും ചാവറ കുര്യാക്കോസ് അച്ചനാണ് എന്നും ബിഷപ് കൂട്ടി ചേര്ത്തു.
കത്തിഡ്രല് വികാരി റവ.ഡോ. ലാസര് കുറ്റിക്കാടന് അധ്യക്ഷത വഹിച്ചു. നഗരസഭ ചെയര്മാന് എം.പി. ജാക്സണ് മുഖ്യാതിഥി ആയിരുന്നു. രൂപത കോര്പ്പറേറ്റ് മാനേജര് ഫാ. സിജോ ഇരിമ്പന് വിരമിക്കുന്നവരുടെ ഫോട്ടോ അനാഛാദനം നിര്വഹിച്ചു.
പ്രിന്സിപ്പല് പി. ആന്സന് ഡൊമിനിക്, ട്രസ്റ്റി തോമസ് തൊകലത്ത്, വാര്ഡ് കൗണ്സിലര് ജോസഫ് ചാക്കോ, പിടിഎ പ്രസിഡന്റ് ഷാജു ജോസ് ചിറയത്ത്, രജത ജൂബിലി ആഘോഷ കമ്മിറ്റി സഹരക്ഷാധികാരി ആന്റണി ജോണ് കണ്ടംകുളത്തി, പ്രോഗ്രാം കമ്മറ്റി കണ്വീനര് ടെല്സണ് കോട്ടോളി, ഫൈനാന്സ് കമ്മറ്റി കണ്വീനര് ലിംസണ് ഊക്കന്, ഹൈസ്കൂള് പ്രധാനധ്യാപിക റീജ ജോസ്, മുന് പ്രിന്സിപ്പല് ബിജു ആന്റണി, റപ്പായി പന്തല്ലിപ്പാടന്, സ്റ്റാഫ് സെക്രട്ടറി എ.ടി. ഷാലി, ഫസ്റ്റ് അസിസ്റ്റന്റ് എം.ജെ.ഷീജ, അനധ്യാപക പ്രതിനിധി ഡൊണാള്ഡ് ജോര്ജ്, സ്കൂള് ചെയര്മാന് സി.ബി. ക്രിസ്റ്റഫര് എന്നിവര് പ്രസംഗിച്ചു. റിട്ടയര് ചെയ്യുന്ന ബോട്ടണി അധ്യാപിക ജിജി ജോര്ജ്, ലാബ് അസിസ്റ്റന്റ് വി.പി. ജോസഫ് എന്നിവര്ക്ക് യാത്രയയപ്പ് നല്കി.