നവീകരിച്ച താനൂർ റെയിൽവെ സ്റ്റേഷൻ മന്ദിരം മന്ത്രി വി.അബ്ദുറഹിമാൻ യാത്രക്കാർക്ക് തുറന്നുകൊടുക്കുന്നു.
താനൂർ: അത്യാധുനിക സൗകര്യങ്ങളോടെ നവീകരിച്ച താനൂർ റെയിൽവേ സ്റ്റേഷൻ മന്ദിരത്തിന്റെ ഉദ്ഘാടനം മന്ത്രി പി.എ. മുഹമ്മദ് റിയാസ് ഓണ്ലൈനായി നിർവഹിച്ചു. താനൂർ റെയിൽവേ സ്റ്റേഷൻ പരിസരത്ത് നടന്ന ചടങ്ങിൽ മന്ത്രി വി. അബ്ദുറഹ്മാൻ ശിലാഫലകം അനാച്ഛാദനം ചെയ്തു. 1.5 കോടി രൂപ ചെലവിട്ടാണ് റെയിൽവേ സ്റ്റേഷൻ നവീകരിച്ചത്.
പുതിയ ടിക്കറ്റ് ബുക്കിംഗ് ഓഫീസ്, ഉയർന്ന ശ്രേണി യാത്രക്കാർക്കുള്ള കാത്തിരിപ്പ് കേന്ദ്രം, ടോയ്ലറ്റ് കോംപ്ലക്സ്, ഒന്നാം പ്ലാറ്റ്ഫോമിൽ മേൽക്കൂര, പ്ലാറ്റ്ഫോമിൽ വിപുലമായ ഇരിപ്പിട സൗകര്യം, മിനി മാസ്റ്റർ ഉൾപ്പെടുന്ന വൈദ്യുതി വിളക്കുകൾ എന്നിവ ഉൾപ്പെടുത്തിയ ബൃഹത് പദ്ധതികളാണ് റെയിൽവേ സ്റ്റേഷനിൽ നടപ്പാക്കിയത്.
റെയിൽവേ സ്റ്റേഷൻ നവീകരണത്തിനായി എംഎൽഎയുടെ ആസ്തി വികസന ഫണ്ട് ഇതാദ്യമായി ഉപയോഗിക്കുന്നത് താനൂരിലാണെന്നതും പ്രത്യേകതയാണ്. കോഴിക്കോട് -ഷൊർണൂർ ഭാഗങ്ങിലേക്കായി 13 ട്രെയിനുകളാണ് താനൂരിൽ നിർത്തുന്നത്. 10 പാസഞ്ചർ ട്രെയിനുകളും 14 എക്സ്പ്രസ്സ് ട്രെയിനുകളും രണ്ട് സൂപ്പർ ഫാസ്റ്റ് മെയിലും ഇതിൽപ്പെടും.
Tags : Local News Nattuvishesham Malappuram