കുഞ്ചൻനന്പ്യാർ സ്മാരകത്തിന്റെ പുനരുദ്ധാരണ പ്രവൃത്തികളുടെ ഉദ്ഘാടനം അഡ്വ. കെ. പ്രേംകുമാർ എംഎൽഎ നിർവഹിക്കുന്നു.
ഒറ്റപ്പാലം: സംസ്ഥാന സാംസ്കാരിക വകുപ്പിന്റെ കീഴിലുള്ള കുഞ്ചൻ നന്പ്യാർ സ്മാരകത്തിന്റെ പുനരുദ്ധാരണ പ്രവൃത്തികൾക്ക് തുടക്കമായി. പദ്ധതിയുടെ ഉദ്ഘാടനം അഡ്വ.കെ. പ്രേംകുമാർ എംഎൽഎ നിർവഹിച്ചു.
മഹാകവി കുഞ്ചൻനന്പ്യാരുടെ ജന്മഗൃഹം, പത്തായപ്പുര, പടിപ്പുര എന്നിവ കാലപ്പഴക്കം സംഭവിച്ച് നശിച്ചുപോകുന്ന സാഹചര്യമായിരുന്നു. ഈ കെട്ടിടങ്ങളുടെ തനിമ നിലനിർത്തിക്കൊണ്ട് പുനരുദ്ധാരണ പ്രവർത്തനങ്ങൾ നടത്താൻ സർക്കാർ 1.96 കോടി രൂപ ഭരണാനുമതി നൽകിയിരുന്നു.
ആദ്യ ഗഡുവായി ലഭ്യമായ 39 ലക്ഷം രൂപ (39,20,000) വിനിയോഗിച്ചാണ് പുനരുദ്ധാരണ പ്രവർത്തനങ്ങൾ നടത്തുന്നത്. പരിപാടിയിൽ കുഞ്ചൻ നന്പ്യാർ സ്മാരകസമിതി ചെയർമാൻ കെ. ജയദേവൻ അധ്യക്ഷനായി.
ഒറ്റപ്പാലം ബ്ലോക്ക് പഞ്ചായത്ത് പ്രസിഡന്റ് കെ. സുരേഷ്, ലക്കിടി പേരൂർ ഗ്രാമപഞ്ചായത്ത് വൈസ് പ്രസിഡന്റ് എം. രാമകൃഷ്ണൻ, ഒറ്റപ്പാലം ബ്ലോക്ക് പഞ്ചായത്ത് അംഗം കെ. സുനിത,കുഞ്ചൻ നന്പ്യാർ സ്മാരകസമിതി സെക്രട്ടറി എൻ. എം. നാരായണൻ നന്പൂതിരി, ഭരണസമിതി അംഗം കെ. രാജേഷ് തുടങ്ങിയവർ പങ്കെടുത്തു.