കാഞ്ഞങ്ങാട്: ജില്ലാ പഞ്ചായത്ത് ക്ഷേമകാര്യ സ്ഥിരം സമിതി ചെയർപേഴ്സണായി തെരഞ്ഞെടുക്കപ്പെട്ട റീന തോമസിനും സ്ഥാനമൊഴിഞ്ഞ ജില്ലാ പഞ്ചായത്തംഗവും സ്ഥിരംസമിതി ചെയർമാനുമായിരുന്ന ഷിനോജ് ചാക്കോയ്ക്കും കേരള കോൺഗ്രസ്- എം ജില്ലാ കമ്മിറ്റി യോഗത്തിൽ ആദരം. റീന തോമസിനെ ജില്ലാ പ്രസിഡന്റ് സജി സെബാസ്റ്റ്യനും ഷിനോജ് ചാക്കോയെ സംസ്ഥാന ജനറൽ സെക്രട്ടറി കുര്യാക്കോസ് പ്ലാപ്പറമ്പിലും കള്ളാർ പഞ്ചായത്ത് മുൻ അംഗം ജോസ് പുതുശേരികാലായിലിനെ മുതിർന്ന നേതാവ് ജേക്കബ് കാനാട്ടും പൊന്നാടയണിച്ച് ആദരിച്ചു.
കാസർഗോഡ് ജില്ലാ പഞ്ചായത്തിൽ ആദ്യമായി പാർട്ടിക്ക് പ്രാതിനിധ്യം നേടിയെടുക്കുകയും അഞ്ചുവർഷത്തെ മാതൃകാപരമായ പ്രവർത്തനങ്ങളിലൂടെ വിജയം ആവർത്തിക്കാൻ വഴിയൊരുക്കുകയും ചെയ്ത ഷിനോജ് ചാക്കോയെ അഭിനന്ദിച്ചു. എൽഡിഎഫിന്റെ കേരള യാത്രയ്ക്ക് ജില്ലയിലെ വിവിധ സ്വീകരണ കേന്ദ്രങ്ങളിൽ നൂറുകണക്കിന് കേരള കോൺഗ്രസ്- എം പ്രവർത്തകരുടെ പങ്കാളിത്തം ഉറപ്പുവരുത്തും.
കെ.എം. മാണിയുടെ ജന്മദിനമായ ജനുവരി 30 ഈ വർഷവും കാരുണ്യ ദിനമായി ആചരിക്കും. അന്ന് ജില്ലയിലെ വിവിധ കേന്ദ്രങ്ങളിൽ കാരുണ്യ പ്രവർത്തനങ്ങൾ സംഘടിപ്പിക്കാനും യോഗം തീരുമാനിച്ചു. ജില്ലാ വൈസ് പ്രസിഡന്റ് ജോയി മൈക്കിൾ, സെക്രട്ടറിമാരായ ബിജു തുളുശേരി, സിജി കട്ടക്കയം, നിയോജകമണ്ഡലം പ്രസിഡന്റുമാരായ രാഘവ ചേരാൽ, ടിമ്മി എലിപുലിക്കാട്ട്, ജോസ് ചേന്നാക്കാട്ട്കുന്നേൽ, മണ്ഡലം പ്രസിഡന്റുമാരായ തങ്കച്ചൻ വടക്കേമുറി, ടോമി വാഴപ്പിള്ളി, ജോയി തടത്തിൽ, ടോമി ഇഴറാട്ട്, ബേബി പുതുമന, മാത്യു കാഞ്ഞിരത്തിങ്കൽ എന്നിവർ പ്രസംഗിച്ചു.