106.68 കോടി രൂപ അനുവദിച്ചതായി മോന്സ് ജോസഫ്
കടുത്തുരുത്തി: റീ-ബില്ഡ് കേരള ഇനിഷ്യേറ്റീവ് പദ്ധതിയില് ഉള്പ്പെടുത്തി പൊതുമരാമത്ത് വകുപ്പ് നടപ്പാക്കിവരുന്നതിനിടെയില് വിവിധ സാങ്കേതിക, സാമ്പത്തിക പ്രശ്നങ്ങള് മൂലം മുടങ്ങിപ്പോയ കടുത്തുരുത്തി-വൈക്കം മണ്ഡലങ്ങളെ ബന്ധിപ്പിച്ചുകൊണ്ടുള്ള റോഡ് നിര്മാണപ്രവര്ത്തനങ്ങള് പുനരാരംഭിക്കാന് ഇന്നലെ ചേര്ന്ന മന്ത്രിസഭാ യോഗം അനുമതി നല്കിയതായി മോന്സ് ജോസഫ് എംഎല്എ അറിയിച്ചു.
മുട്ടുചിറ-വാലാച്ചിറ റെയില്വേ ഗേറ്റ്-ആയാംകുടി-എഴുമാന്തുരുത്ത്-വടയാര് റോഡിന്റെയും മുളക്കുളം-അമ്പലപ്പടി ജംഗ്ഷന്-വെള്ളൂര്-വടയാര് ചന്തപ്പാലം റോഡിന്റെയും നിര്മാണപ്രവര്ത്തനങ്ങള് പുനരാരംഭിക്കുന്നതിന് പൊതുമരാമത്ത് വകുപ്പ് തയാറാക്കിയ പുതുക്കിയ പ്രോജക്ടിന് അംഗീകാരം നല്കിക്കൊണ്ടാണ് മന്ത്രിസഭാ യോഗം ഇക്കാര്യത്തില് അനുകൂല തീരുമാനമെടുത്തത്.
റോഡ് വികസനപ്രവര്ത്തനങ്ങളുടെ ശേഷിക്കുന്ന നിര്മാണ ജോലികള് പൂര്ത്തിയാക്കുന്നതിന് പൊതുമരാമത്ത് വകുപ്പ് തയാറാക്കുകയും ധനകാര്യ വകുപ്പ് അംഗീകരിക്കുകയും ചെയ്ത പുതുക്കിയ പ്രോജക്ട് പ്രകാരം 106.68 കോടി രൂപ അനുവദിച്ചുകൊണ്ടാണ് സര്ക്കാര് ഇക്കാര്യത്തില് അനുകൂല തീരുമാനമെടുത്തത്.
റോഡ് നിര്മാണം മുടങ്ങിപ്പോയതിനെത്തുടര്ന്ന് നാളുകളായി നാട്ടുകാര് അനുഭവിക്കുന്ന യാത്രാദുരിതവും കഷ്ടപ്പാടും പരിഹരിക്കുന്നതിനു വേണ്ടി സര്ക്കാര് അടിയന്തര ഇടപെടല് നടത്തേണ്ടതിന്റെ ആവശ്യകത നിയമസഭയ്ക്കകത്തും മന്ത്രിസഭാ തലത്തിലും നിരവധി പ്രാവശ്യം ഉന്നയിച്ചിരുന്നതായി മോന്സ് ജോസഫ് എംഎല്എ അറിയിച്ചു.
Tags : Local News Nattuvishesham Kottayam