നാലുകെട്ടിലെ എസ്സി ഫ്ലാറ്റിൽ സൺഷെയ്ഡിനോടുചേർന്ന തൂക്കുസ്ലാബ് തകർന്നുവീണ നിലയിൽ.
കൊരട്ടി: ജില്ലാപഞ്ചായത്തിന്റെ ഫണ്ടുപയോഗിച്ച് പട്ടികജാതി വിഭാഗത്തിനായി കൊരട്ടി പഞ്ചായത്തിലെ നാലുകെട്ടിൽ നിർമിച്ച ഫ്ലാറ്റിൽ സൺഷെയ്ഡിനോടുചേർന്ന തൂക്കുസ്ലാബ് തകർന്നുവീണു.
കഴിഞ്ഞദിവസംപെയ്ത ശക്തമായ മഴയ്ക്കുശേഷമാണ് സ്ലാബ് തകർന്നുവീണത്. സംഭവത്തിൽ താമസക്കാർക്ക് പരിക്കേൽക്കാതിരുന്നതാണ് ആശ്വാസകരം. 12 കുടുംബങ്ങളാണ് ഫ്ലാറ്റിൽ താമസിക്കുന്നത്. 2014ലാണ് നിർമാണം പൂർത്തിയായത്. കെട്ടിടത്തിന്റെ ഒരുഭാഗമാണ് ഇപ്പോൾ തകർന്നത്.
കഴിഞ്ഞവർഷം ഫ്ലാറ്റിന്റെ ചുറ്റുമതിലും തകർന്നു. കാലങ്ങളായി കെട്ടിടത്തിൽ യാതൊരു അറ്റകുറ്റപ്പണികളും നടത്തിയിട്ടില്ലെന്നാണ് നാട്ടുകാർ ആരോപിക്കുന്നത്.
അധികൃതരുടേയോ, താമസക്കാരുടേയോ ഭാഗത്തുനിന്ന് ആവശ്യമായ ഇടപെടൽ ഉണ്ടായിട്ടില്ലെന്നതും ശ്രദ്ധേയമാണ്. സംഭവത്തെ തുടർന്ന് ഫ്ലാറ്റിന്റെ സുരക്ഷയെക്കുറിച്ച് താമസക്കാർ ആശങ്ക പ്രകടിപ്പിച്ചിട്ടുണ്ട്.
അടിയന്തരമായി പരിശോധനനടത്തി അറ്റകുറ്റപ്പണികൾ നടത്തണമെന്ന ആവശ്യവും ഉയർന്നിട്ടുണ്ട്.