പാലാ: പാലായിലെ മാര് സ്ലീവാ കാന്സര് കെയര് ആൻഡ് റിസര്ച്ച് സെന്ററില് സ്ഥാപിച്ച അത്യാധുനിക സിമന്സ് സിംബിയ ഇവോ എക്സല് ഗാമ കാമറ സ്പെക്റ്റിന്റെ സേവനങ്ങള് ആരംഭിച്ചു. ഓങ്കോ സയന്സസ് വിഭാഗത്തില് നടന്ന ചടങ്ങില് ആശുപത്രി മാനേജിംഗ് ഡയറക്ടര് മോണ്. ജോസഫ് കണിയോടിക്കല് ഗാമ കാമറ സ്പെക്റ്റിന്റെ വെഞ്ചരിപ്പും ഉദ്ഘാടനവും നിര്വഹിച്ചു.
സ്പെക്റ്റ് നല്കുന്ന ത്രീഡി ഇമേജുകള് വഴി അവയവങ്ങളുടെ പ്രവര്ത്തനങ്ങളെ വിലയിരുത്തി രോഗനിര്ണയത്തിന്റെ കൃത്യത മെച്ചപ്പെടുത്തുന്നതാണ് ഗാമ കാമറ സ്പെക്റ്റിന്റെ പ്രത്യേകത.
ശരീരത്തിലെ വിവിധ അവയവങ്ങളുടെ പ്രവര്ത്തനം അതിവിശദമായി നിരീക്ഷിക്കാന് സാധിക്കുന്നതിനാല് രോഗനിര്ണയത്തില് കൂടുതല് കൃത്യത കൈവരിക്കാനും ചികിത്സയില് ആവശ്യമായ മാറ്റങ്ങള് തത്സമയം വരുത്തുന്നതിനും ഡോക്ടര്മാര്ക്കു സാധിക്കും.
മറ്റു സ്കാനിംഗുകളിലൂടെ കണ്ടെത്താന് കഴിയാതെ പോകുന്ന രോഗാവസ്ഥകളെയും പ്രാരംഭഘട്ടങ്ങളില് ഉണ്ടാകുന്ന അവയവങ്ങളുടെ പ്രവര്ത്തന വ്യതിയാനങ്ങളെയും കൃത്യമായി തിരിച്ചറിയുന്നതില് സ്പെക്റ്റ് ഏറ്റവും മികച്ച നിര്ണയമാര്ഗങ്ങളിലൊന്നാണ്.
തൈറോയ്ഡ് കാന്സര്, പ്രോസ്റ്ററേറ്റ് കാന്സര്, പോളിസൈത്തീമിയ, ന്യൂറോഎന്ഡോക്രൈന് ട്യൂമറുകള് തുടങ്ങി നിരവധി കാന്സറുകള്ക്കാണ് ന്യൂക്ലിയര് മെഡിസന് ഉപയോഗിച്ച് ചികിത്സ നടത്തുന്നത്. മയോകാര്ഡിയല് പെര്ഫ്യൂഷന് ആന്ഡ് ഫംഗ്ഷന് സ്റ്റഡി, റീനോഗ്രാം, റീനല് കോര്ട്ടിക്കല് ഇമേജിംഗ്, ട്രാന്സ്പ്ലാന്റ് കിഡ്നി സ്റ്റഡി, തൈറോയ്ഡ് സ്കാന്, പാരത്തൈറോയ്ഡ് സ്കാന്, ബോണ് സ്കാന്, ഹെപറ്റോബിലിയറി ആന്ഡ് ഗാസ്ട്രോയിന്റ്സ്റ്റൈനല് സ്കാന്, ഡിമെന്ഷ അസസ്മെന്റ് സ്റ്റഡികള് തുടങ്ങിയവയാണ് സ്പെക്റ്റ് സ്കാനറിലൂടെ ചെയ്യാന് കഴിയുന്ന പ്രധാന പരിശോധനകള്.
ചടങ്ങില് ഹോസ്പിറ്റല് സിഇഒ റവ. ഡോ. അഗസ്റ്റിന് കൂട്ടിയാനിയില്, ചീഫ് ഓഫ് മെഡിക്കല് സര്വീസസ് എയര് കൊമഡോര് ഡോ. പോളിന് ബാബു, ഓങ്കോ സയന്സസ് വിഭാഗം മേധാവി ഡോ. റോണി ബെന്സണ്, ന്യൂക്ലിയര് മെഡിസിന് വിഭാഗം മേധാവിയും സീനിയര് കണ്സള്ട്ടന്റുമായ ബ്രിഗേഡിയര് ഡോ. എം. ജെ. ജേക്കബ്, സര്ജിക്കല് ഓങ്കോളജി വിഭാഗം മേധാവിയും സീനിയര് കണ്സള്ട്ടന്റുമായ ഡോ. ജോഫിന് കെ. ജോണി, റേഡിയേഷന് ഓങ്കോളജി വിഭാഗം കോ-ഓര്ഡിനേറ്ററും കണ്സള്ട്ടന്റുമായ ഡോ. സോണ്സ് പോള് തുടങ്ങിയവര് പങ്കെടുത്തു
Tags : Mar Sliwa Medicity