നഗര സൗന്ദര്യവത്കരണത്തിനു നട്ട ചെടികൾ കരിഞ്ഞുണങ്ങിയ നിലയിൽ.
അടൂർ: സൗന്ദര്യവത്കരണ പദ്ധതിയുടെ ഭാഗമായി നഗരസഭ നട്ടുപിടിപ്പിച്ച അലങ്കാര ചെടികൾ വേനൽചൂടിൽ കരിഞ്ഞുണങ്ങി. നഗരത്തിന്റെ പ്രവേശന കവാടമായ നെല്ലിമൂട്ടിപ്പടി ബൈപാസ് ആരംഭിക്കുന്ന ഭാഗത്തെ ട്രാഫിക് ഡിവൈഡറിനുള്ളിൽ ചെടികൾ നട്ടുപിടിപ്പിച്ച് നഗരസൗന്ദര്യം വർധിപ്പിക്കാൻ ശ്രമം നടത്തിയിരുന്നു.
പുതുവർഷത്തിന്റെ തുടക്കത്തിൽ നഗരത്തിന്റെ പുതുമയാർന്ന രൂപം വളരെ ശ്രദ്ധേയമാകുകയും ചെയ്തതാണ്. ഇവയുടെ സംരക്ഷണത്തിലെ പാളിച്ച മൂലം വേനൽച്ചൂടിൽ കരിഞ്ഞുണങ്ങിയത്.
സ്ഥിരമായി വെള്ളമൊഴിക്കുന്ന സംവിധാനമില്ലെങ്കിൽ അവശേഷിക്കുന്ന ചെടികളും നശിക്കുമെന്ന മട്ടാണ്.
സൗന്ദര്യവത്കരണ പദ്ധതികൾക്ക് തുടർച്ചയായ പരിപാലന സംവിധാനങ്ങൾ ഉറപ്പാക്കണമെന്ന് നാട്ടുകാർ ആവശ്യപ്പെട്ടു.