കോട്ടഞ്ചേരി വനവിദ്യാലയത്തിൽ നടക്കുന്ന പാരമ്പര്യ നാട്ടുവൈദ്യ സഹവാസ ക്യാമ്പിൽ ദേശീയ ഔഷധസസ്യ ബോർഡിലെ ശാസ്ത്രജ്ഞൻ ഡോ. പി. സുജനപാൽ പ്രസംഗിക്കുന്നു.
കൊന്നക്കാട്: കേരള പാരമ്പര്യ നാട്ടുവൈദ്യ ഏകോപന സമിതിയുടെ ആഭിമുഖ്യത്തിൽ ദേശീയ ഔഷധസസ്യ ബോർഡിന്റെയും ഫോറസ്റ്റ് റിസർച്ച് ഇൻസ്റ്റിറ്റ്യൂട്ടിന്റെയും സഹകരണത്തോടെയുള്ള ദ്വിദിന പ്രകൃതിപഠന സഹവാസ ക്യാമ്പിന് കോട്ടഞ്ചേരി വനവിദ്യാലയത്തിൽ തുടക്കമായി.
ഔഷധദ്രവ്യ ദൗർലഭ്യവും ഔഷധസസ്യകൃഷിയും എന്ന വിഷയത്തിൽ ദേശീയ ഔഷധസസ്യ ബോർഡിലെ ശാസ്ത്രജ്ഞൻ ഡോ. പി. സുജനപാൽ മുഖ്യപ്രഭാഷണം നടത്തി. വൈദ്യന്മാർ അവരവരുടെ ആവശ്യത്തിനായുള്ള ഔഷധ ചെടികൾ സ്വന്തമായി കൃഷി ചെയ്യണമെന്നും അതിന് ഔഷധസസ്യ ബോർഡിന്റെ ഭാഗത്തുനിന്ന് ആവശ്യമായ സഹായങ്ങളും വിത്തുകളും ലഭ്യമാക്കുമെന്നും അദ്ദേഹം പറഞ്ഞു.
തൊഴിലുറപ്പ് പദ്ധതിയും നഗരവത്കരണവുമെല്ലാം മൂലം ഔഷധസസ്യങ്ങൾ നശിച്ചുകൊണ്ടിരിക്കുകയാണെന്ന് സീക്ക് വനവിദ്യാലയം ഡയറക്ടർ ടി.പി. പദ്മനാഭൻ പറഞ്ഞു.
ഏകോപന സമിതി സംസ്ഥാന പ്രസിഡന്റ് പി. രവീന്ദ്രൻ വൈദ്യർ അധ്യക്ഷത വഹിച്ചു. വൈ.എസ്. ജയകുമാർ, ഉമാപതി വൈദ്യർ, പി.കെ. ചന്ദ്രൻ വൈദ്യർ, വത്സലൻ വൈദ്യർ, കൃഷ്ണപ്രസാദ് വൈദ്യർ, കയനി രാജൻ വൈദ്യർ, ഗോവിന്ദൻ വൈദ്യർ, ടി.കെ. സുനീഷ് വൈദ്യർ, ജോസഫ് വൈദ്യർ എന്നിവർ പ്രസംഗിച്ചു.
പരിസ്ഥിതി പ്രവർത്തകൻ ഡോ. ഇ. ഉണ്ണികൃഷ്ണൻ, ഔഷധസസ്യ ബോർഡ് അസി. പ്രോജക്ട് മാനേജർ സുധീഷ്, മാർക്കറ്റിംഗ് മാനേജർ നിഖില ദാമോദരൻ എന്നിവർ ക്ലാസുകൾ നയിച്ചു.