കണ്ണൂർ: കണ്ണൂര് വാരിയേഴ്സ് എഫ്സിയുടെ കണ്ണൂര് മുനിസിപ്പല് ജവഹര് സ്റ്റേഡിയത്തിലെ മത്സരക്രമമായി. അഞ്ച് ഹോം മത്സരങ്ങളാണ് ജവഹര് സ്റ്റേഡിയത്തിലുള്ളത്. നവംബര് ഏഴിന് ആദ്യ മത്സരത്തില് തൃശൂര് മാജിക് എഫ്സിയെ നേരിടും.
രാത്രി 7.30നാണ് എല്ലാ മത്സരങ്ങളുടെയും കിക്കോഫ്. 10 ന് തിരുവനന്തപുരം കൊമ്പന്സ് എഫ്സി, 19 ന് മലപ്പുറം എഫ്സി, 23 ന് ഫോഴ്സ കൊച്ചി എഫ്സി, 28 ന് കാലിക്കട്ട് എഫ്സി എന്നിവരാണ് കണ്ണൂരിന്റെ എതിരാളികൾ.
ടീമിന്റെ അഞ്ച് എവേ മത്സരങ്ങളിൽ നാലെണ്ണം പൂര്ത്തിയായിട്ടുണ്ട്. നാല് മത്സരങ്ങളില് മൂന്ന് ജയവും ഒരു സമനിലയുമായി 10 പോയിന്റോടെ തോൽവിയറിയാതെയാണ് ടീമിന്റെ മുന്നേറ്റം. തൃശൂര് കേര്പറേഷന് സ്റ്റേഡിയത്തില് തൃശൂര് മാജിക് എഫ്സിക്കെതിരെയാണ് അവസാന എവേ മത്സരം.
ഗ്രൂപ്പിലെ ആദ്യ നാല് സ്ഥാനക്കാര് സെമി ഫൈനലിന് യോഗ്യത നേടും. സെമി ഫൈനല്, ഫൈനല് മത്സരങ്ങളുടെ വേദി ഇതുവരെ നിശ്ചയിച്ചിട്ടില്ല. സുപ്പര് ലീഗ് കേരളയില് ആദ്യ സീസണില് കണ്ണൂര് വാരിയേഴ്സിന് സ്വന്തമായി ഹോം സ്റ്റേഡിയം ഇല്ലായിരുന്നു. കോഴിക്കോട് കോര്പറേഷന് സ്റ്റേഡിയത്തിലായിരുന്നു ഹോം മത്സരങ്ങള്. നീണ്ട ഇടവേളയ്ക്കുശേഷം കണ്ണൂരില് ഫുട്ബോള് മത്സരങ്ങള് തിരികെയെത്തുന്നുവെന്നതും മറ്റൊരു പ്രത്യേകതയാണ്. കണ്ണൂരിലെ മത്സരങ്ങളുടെ സംഘാടക സമിതി രൂപീകരണം, ഓഫീസ് ഉദ്ഘാടനം, ടിക്കറ്റ് വില്പനയുടെ ഉദ്ഘാടനം എന്നിവ ഇന്ന് നടക്കും.
Tags : nattuvisheasham local