ചെറിയമുണ്ടം ഗവണ്മെന്റ് ഐടിഐയിൽ നിർമിച്ച വനിതാ വിശ്രമകേന്ദ്രത്തിന്റെ ഉദ്ഘാടന ശിലാഫലകം മന്ത്രി വി. അബ്ദുറഹ്മാൻ അനാച്ഛാദനം ചെയ്യുന്നു.
മന്ത്രി ശിവൻകുട്ടി ഉദ്ഘാടനം ചെയ്തു
മലപ്പുറം: ചെറിയമുണ്ടം ഗവണ്മെന്റ് ഐടിഐയിലെ വനിതാ വിശ്രമകേന്ദ്രത്തിന്റെ ഉദ്ഘാടനം പൊതുവിദ്യാഭ്യാസ മന്ത്രി വി. ശിവൻകുട്ടി ഓണ്ലൈനായി നിർവഹിച്ചു. അറിവു നേടുന്നതോടൊപ്പം തൊഴിൽ നൈപുണ്യമുള്ള തലമുറയെ വാർത്തെടുക്കുക എന്നതാണ് ലക്ഷ്യമെന്ന് മന്ത്രി വീഡിയോ സന്ദേശത്തിൽ പറഞ്ഞു. മന്ത്രി വി. അബ്ദുറഹ്മാൻ അധ്യക്ഷത വഹിച്ചു.
വിശ്രമകേന്ദ്രത്തിന്റെ ശിലാഫലകവും അദ്ദേഹം അനാച്ഛാദനം ചെയ്തു. ചെറിയമുണ്ടം മേഖല നേരിടുന്ന പ്രധാന പ്രശ്നമായ കുടിവെള്ളത്തിന് ശാശ്വത പരിഹാരമായി 15 കോടി രൂപ വകയിരുത്തിയ പദ്ധതിക്ക് വൈകാതെ തുടക്കം കുറിക്കുമെന്നും പദ്ധതി പൊൻമുണ്ടം, നിറമരുതൂർ, താനാളൂർ എന്നിവിടങ്ങൾ ഉൾപ്പെടുത്തിയാണ് പദ്ധതി നടത്തുകയെന്നും മന്ത്രി അധ്യക്ഷ പ്രസംഗത്തിൽ പറഞ്ഞു.
വിദ്യാഭ്യാസ വകുപ്പിന്റെ പ്ലാൻ ഫണ്ടിൽനിന്ന് 36.2 ലക്ഷം രൂപ ചെലവിൽ 1300 സ്വകയർ ഫീറ്റിൽ രണ്ടു നിലകളിലായാണ് വിശ്രമകേന്ദ്രം നിർമിച്ചിരിക്കുന്നത്. കെട്ടിടത്തിൽ രണ്ടു ബെഡ്റൂമുകൾ ഒരു ഡൈനിംഗ് ഏരിയ, രണ്ടു ടോയ്ലറ്റുകൾ എന്നീ സൗകര്യങ്ങൾ ഒരുക്കിയിട്ടുണ്ട്. കൂടാതെ വാഹന പാർക്കിംഗ് സൗകര്യവുമുണ്ട്.
ചടങ്ങിൽ ജില്ലാ നിർമിതി കേന്ദ്രം പ്രോജക്ട് മാനേജർ കെ.ആർ. ബീന റിപ്പോർട്ടവതരിപ്പിച്ചു. ഇൻഡസ്ട്രിയൽ ട്രെയിനിംഗ് ഡിപ്പാർട്ട്മെന്റ് ജോയിന്റ് ഡയറക്ടർ എസ്. വികാസ്, ചെറിയമുണ്ടം ഗ്രാമപഞ്ചായത്ത് പ്രസിഡന്റ് പി.ടി. അബ്ദുൾ നാസർ, മെംബർ സി.ടി അബ്ദുൾ റഷീദ്, അരീക്കോട് ഗവണ്മെന്റ് ഐടിഐ പ്രിൻസിപ്പൽ ഇൻ-ചാർജ് വി. ഉണ്ണികൃഷ്ണൻ, പിടിഎ പ്രസിഡന്റ് കെ.സൽമ, പ്രിൻസിപ്പൽ എം.വി. വിജയപ്രസാദ്, വിവിധ രാഷ്ട്രീയ പാർട്ടി പ്രതിനിധികൾ തുടങ്ങിയവർ ചടങ്ങിൽ പങ്കെടുത്തു.
Tags : Local News Nattuvishesham Malappuram