അടൂർ: യുവതി ജീവനൊടുക്കിയ സംഭവത്തില് യൂത്ത് കോണ്ഗ്രസ് സംസ്ഥാന സെക്രട്ടറി സുഹൈല് അന്സാരിയെ പോലീസ് അറസ്റ്റ് ചെയ്തു. പോരുവഴി മയ്യത്തുംകര അര്ത്തിയില് വീട്ടില് സുഹൈല് അന്സാരി (33)യെയാണ് ആത്മഹത്യാപ്രേരണ കുറ്റത്തിന് ഏനാത്ത് പോലീസ് ഇന്നലെ രാവിലെ അറസ്റ്റ് ചെയ്തത്.
14ന് പുലര്ച്ചെ കടമ്പനാട് സ്വദേശി രേണു അനിൽ(37) തൂങ്ങിമരിച്ച കേസിലാണ് അറസ്റ്റ്. യുവതിയുടെ ആത്മഹത്യയില് നാട്ടുകാരും ബന്ധുക്കളും സംശയം ഉന്നയിച്ചിരുന്നു. ഇതേത്തുടര്ന്ന് ഭര്ത്താവിനെ ചോദ്യം ചെയ്തു. ഇതിനിടയില് യുവതിയുടെ ഫോണ് ഭര്ത്താവ് പോലിസിന് കൈമാറി. ഇതിലുണ്ടായിരുന്ന വാട്സ് ആപ് ചാറ്റുകള് പരിശോധിച്ച ശേഷമാണ് സുഹൈല് അന്സാരിയെ പോലീസ് അറസ്റ്റ് ചെയ്യുന്നത്.
ശൂരനാട്ടെ ഒരു സ്കൂളിലെ ഓഫീസ് സ്റ്റാഫ് ആയിരുന്ന രേണുവിനോട് അതേ സ്കൂളിലെ പിആര്ഒ ആയിരുന്ന സുഹൈല് വഴിവിട്ട ബന്ധത്തിനു പ്രേരിപ്പിച്ചെന്നും സ്വകാര്യ ചിത്രങ്ങള് അയച്ചു കൊടുക്കാന് ആവശ്യപ്പെട്ടെന്നും അതില് മനംനൊന്താണ് ആത്മഹത്യയെന്നും പോലീസ് പരിശോധനയില് കണ്ടെത്തിയ രേണുവിന്റെ കുറിപ്പില് പറയുന്നു. കോടതിയില് ഹാജരാക്കിയ സുഹൈല് അന്സാരിയെ റിമാന്ഡ് ചെയ്തു.