കൊച്ചി: ബിജെപി ദേശീയ അധ്യക്ഷന്‍ നിതിന്‍ നബീന്‍ ഇന്നു കേരളത്തിലെത്തും. ഇന്ന് എറണാകുളം ജില്ലയിലും ശനിയാഴ്ച തൃശൂര്‍ ജില്ലയിലും വിവിധ യോഗങ്ങളില്‍ അദ്ദേഹം പങ്കെടുക്കും. പാര്‍ട്ടി അധ്യക്ഷനായ ശേഷം ഇതാദ്യമായിട്ടാണ് നിതിന്‍ നബീന്‍ കേരളത്തിലെത്തുന്നത്.

ഉച്ചയ്ക്ക് 1. 45 ന് കൊച്ചി അന്താരാഷ്ട്ര വിമാനത്താവളത്തില്‍ എത്തുന്ന നിതിനെ ബിജെപി, എന്‍ഡിഎ നേതാക്കള്‍ ചേര്‍ന്ന് സ്വീകരിക്കും. വിമാനത്താവളത്തിന് അടുത്ത് താജ് ഹോട്ടലില്‍ ഉച്ചയ്ക്ക് 2.30 ന് ബിജെപി സംസ്ഥാന കോര്‍ കമ്മിറ്റി ചേരും. നിയമസഭാ തെരഞ്ഞെടുപ്പില്‍ സ്വീകരിക്കേണ്ട നിലപാടുകളും സ്ഥാനാർഥി നിര്‍ണയവുമെല്ലാം യോഗത്തില്‍ ചർച്ചയാകുമെന്നാണ് സൂചന.

വൈകുന്നേരം നാലിന് അങ്കമാലി അഡ്‌ലക്‌സ് കണ്‍വെന്‍ഷന്‍ സെന്‍ററില്‍ നടക്കുന്ന എറണാകുളം- ആലപ്പുഴ ജില്ലകളിലെ ആറായിരത്തോളം ബൂത്ത് പ്രസിഡന്‍റുമാരുടെ സമ്മേളനത്തില്‍ നിതിന്‍ നബീന്‍ പങ്കെടുക്കും. 5.30 ന് പാലാരിവട്ടം റിനൈ ഹോട്ടലില്‍ ബിജെപി സംസ്ഥാന ഭാരവാഹികളുടേയും ജില്ലാ പ്രസിഡന്‍റുമാരുടെയും മോര്‍ച്ച അധ്യക്ഷന്മാരുടേയും യോഗത്തിലും പങ്കെടുക്കും.

തുടര്‍ന്ന് എന്‍ഡിഎ സംസ്ഥാന നേതാക്കളുമായുള്ള കൂടിക്കാഴ്ചയും അത്താഴവിരുന്നുമുണ്ടാകും. രാത്രി 8.15 ന് നിതിന്‍ നബീന്‍ എളമക്കരയിലെ ആര്‍എസ്എസ് സംസ്ഥാന കാര്യാലയവും സന്ദര്‍ശിക്കും.

ശനിയാഴ്ച രാവിലെ കാലടി ആദിശങ്കര ജന്മഭൂമിക്ഷേത്രം സന്ദര്‍ശിച്ച ശേഷം ബിജെപി അധ്യക്ഷന്‍ തൃശൂരിലെത്തും. നിയമസഭാതെരഞ്ഞെടുപ്പ് പ്രചാരണത്തിന് തുടക്കമിട്ട് രാവിലെ 10 ന് അദ്ദേഹം തൃശൂര്‍ നഗരത്തില്‍ ചുമരെഴുത്തു നടത്തും.

Tags : BJP national president Nitin Nabin