ചങ്ങനാശേരി: കേരള കാത്തലിക് ടീച്ചേഴ്സ് ഗിൽഡിന്റെ സംസ്ഥാന സമ്മേളനത്തിന് ചങ്ങനാശേരി അതിരൂപത ആതിഥേയത്വം വഹിക്കും. ഫെബ്രുവരി 13, 14 തീയതികളിലായാണ് സമ്മേളനം.
13ന് വൈകുന്നേരം ആർച്ച്ബിഷപ് മാർ ജോസഫ് പവ്വത്തിലിന്റെ കബറിടത്തിൽനിന്നാരംഭിക്കുന്ന ദീപശിഖാ പ്രയാണത്തോടെ സമ്മേളനത്തിന് തുടക്കമാകും. തുടർന്ന് കുന്നന്താനം സെഹിയോൻ ധ്യാനകേന്ദ്രത്തിൽ പ്രതിനിധി സമ്മേളനം നടക്കും.
14ന് രാവിലെ ഒമ്പതിന് ചങ്ങനാശേരി അതിരൂപത ആസ്ഥാനത്തുനിന്ന് ആയിരക്കണക്കിന് അധ്യാപകർ അണിനിരക്കുന്ന റാലി ആരംഭിക്കും. റാലി എസ്ബി കോളജ് ആങ്കണത്തിൽ സമാപിക്കും. 10.30ന് എസ്ബി കോളജ് കാവുകാട്ട് ഹാളിൽ നടക്കുന്ന പൊതുസമ്മേളനം പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. ഗിൽഡ് സംസ്ഥാന പ്രസിഡന്റ് ടോം മാത്യു അധ്യക്ഷത വഹിക്കും.
ചങ്ങനാശേരി ആർച്ച്ബിഷപ് മാർ തോമസ് തറയിൽ ആമുഖ പ്രഭാഷണവും കെസിബിസി വിദ്യാഭ്യാസ കമ്മീഷൻ ചെയർമാൻ കൊല്ലം ബിഷപ് ഡോ. പോൾ ആന്റണി മുല്ലശേരി, സീറോമലബാർ വിദ്യാഭ്യാസ കമ്മീഷൻ ചെയർമാൻ പാലാ ബിഷപ് മാർ ജോസഫ് കല്ലറങ്ങാട്ട് എന്നിവർ അനുഗ്രഹ പ്രഭാഷണങ്ങളും നടത്തും. ജോബ് മൈക്കിൾ എംഎൽഎ പ്രസംഗിക്കും.
ചങ്ങനാശേരി അതിരൂപതയും കോർപറേറ്റ് മാനേജ്മെന്റും സംയുക്തമായാണ് പരിപാടികൾക്ക് നേതൃത്വം നൽകുന്നത്. സംസ്ഥാനത്തിന്റെ വിവിധ ഭാഗങ്ങളിൽനിന്നായി അൻപതിനായിരത്തോളം അധ്യാപക പ്രതിനിധികൾ സംഗമത്തിൽ പങ്കുചേരുമെന്ന് സംഘാടകർ അറിയിച്ചു.
Tags : Kerala Catholic Teachers Guild Conference Changanassery