മാനന്തവാടി: കേരളത്തിലെ മികച്ച ക്ഷീര സംരംഭകന് ഇന്ത്യൻ വെറ്ററിനറി അസോസിയേഷൻ കേരള ഏർപ്പെടുത്തിയ ക്ഷീര പ്രതിഭാ പുരസ്കാരത്തിന് യവനാർകുളം പുൽപ്പറമ്പിൽ ഡെയറി ഫാം ഉടമ പി.ഐ. തങ്കച്ചൻ അർഹനായി. ക്ഷീരമേഖലയിലെ സംരംഭകത്വം പ്രോത്സാഹിപ്പിക്കുന്നതിനായാണ് വെറ്ററിനറി ഡോക്ടർമാരുടെ പ്രഫഷണൽ സംഘടനായ ഇന്ത്യൻ വെറ്ററിനറി അസോസിയേഷൻ കേരള പുരസ്കാരങ്ങൾ ഏർപ്പെടുത്തിയത്.
കിടാരികളും പശുക്കളും ഉൾപ്പെടെ നിരവധി പശുക്കളെ വളർത്തുന്ന മാതൃകാ ക്ഷീരകർഷകനാണ് ക്ഷീരരത്ന പുരസ്കാരം നൽകുന്നത്. 11 മുതൽ 50 വരെ പശുക്കളെ വളർത്തുന്ന മാതൃകാ ക്ഷീരസംരംഭകനാണ് ക്ഷീരപ്രതിഭ പുരസ്കാരം നൽകുന്നത്. സംസ്ഥാനത്തിന്റെ വിവിധ ഭാഗങ്ങളിൽ നിന്നായി 120 ഓളം കർഷകരാണ് ഇത്തവണ പുരസ്കാരത്തിന് അപേക്ഷിച്ചത്. ജില്ലാ, സംസ്ഥാന തലങ്ങളിൽ അവാർഡ് നിർണയ പരിശോധന പൂർത്തിയാക്കിയാണ് ജേതാക്കളെ തെരഞ്ഞെടുത്തത്.
40ഓളം പശുക്കളെ വളർത്തുന്ന പുൽപ്പറന്പിൽ ഡെയറി ഫാം ക്ഷീരമേഖലയിൽ മികച്ച മാതൃകയാണ്. അത്യുത്പാദനമുള്ള ഇരുപതോളം പശുക്കളിൽ നിന്നായി പ്രതിദിനം 500 ലിറ്ററിലധികം പാലാണ് ഇദ്ദേഹത്തിന്റെ ഫാമിൽ ഉത്പാദിപ്പിക്കുന്നത്. പ്രതിദിനം 40 ലിറ്ററിലധികം പാൽ ചുരത്തുന്ന പശുക്കൾ വരെ തങ്കച്ചന്റെ ഫാമിലുണ്ട്.
ആധുനിക ക്ഷീരസംരംഭത്തിന് ആവശ്യമായ സാങ്കേതിക സംവിധാനങ്ങൾ ഫാമിൽ ഒരുക്കിയിട്ടുണ്ട്. ഫാം ലൈസൻസിന് പുറമെ ഐഎസ്ഒ അംഗീകാരം കൂടി നേടിയ ഫാമാണ് തങ്കച്ചന്റേത്. കേരള വെറ്ററിനറി സർവകലാശാലയുടെ ഫാം സ്കൂൾ ആയും ഫാം തെരഞ്ഞെടുക്കപ്പെട്ടിട്ടുണ്ട്.
ക്ഷീരമേഖലയിലെ മികവിന് 17 അവാർഡുകൾ ദേശീയ, സംസ്ഥാന തലങ്ങളിൽ ലഭിച്ചിട്ടുണ്ട്. ക്ഷീരകർഷകയായ ഭാര്യ ബീന ഗുജറാത്തിൽ നടത്തിയ അന്തരാഷ്ട്ര സെമിനാറിൽ കേരളത്തെ പ്രതനിധീകരിച്ചിട്ടുണ്ട്. 25,000 രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്കാരം.
Tags : Ksheerapratibha Award Mananthavadi native P.I. Thankachan