പാറ്റ്ന: ജീവന് ഭീഷണിയുണ്ടെന്ന് ലാലുപ്രസാദ് യാദവിന്റെ മൂത്തമകനും ജനശക്തി ജനതാദൾ നേതാവുമായ തേജ് പ്രതാപ്. ശത്രുക്കൾ തന്നെ കൊലപ്പെടുത്തിയേക്കുമെന്നും അദ്ദേഹം പറഞ്ഞു. പാറ്റ്നയിൽ മാധ്യമപ്രവർത്തകരോട് സംസാരിക്കുകയായിരുന്നു തേജ് പ്രതാപ്. ബിഹാർ നിയമസഭാ തെരഞ്ഞെടുപ്പിൽ മഹുവയിലെ സ്ഥാനാർഥിയാണ് തേജ് പ്രതാപ്.
“സുരക്ഷ വർധിപ്പിച്ചിട്ടുണ്ട്... ഭീഷണിയുണ്ട്. ശത്രുക്കൾ തന്നെ കൊല്ലാൻ പോലും സാധ്യതയുണ്ട്. എല്ലാവരും ശത്രുക്കളെപ്പോലെയാണ്’’ - തേജ് പ്രതാപ് പറഞ്ഞു. എന്നാൽ ആരുടെ ഭാഗത്തുനിന്നാണു ഭീഷണിയെന്ന് അദ്ദേഹം വെളിപ്പെടുത്തിയില്ല. ഒരു സ്ത്രീയുമായി ബന്ധത്തിലാണെന്ന് വെളിപ്പെടുത്തിയതിനു പിന്നാലെയാണ് തേജ് പ്രതാപിനെ ലാലു ആർജെഡിയിൽനിന്നു പുറത്താക്കിയത്. ഇതിനു ശേഷം തേജ് സ്വന്തം പാർട്ടി രൂപവത്കരിക്കുകയായിരുന്നു.
Tags : Tej Pratap