കൊളോണ്: ജർമനിയിലെ കൊളോണിലെ സീറോമലബാർ സമൂഹത്തിന്റെ ആഭിമുഖ്യത്തിൽ സംഘടിപ്പിച്ച വാർഷിക സാംസ്കാരിക മേള "തകധിമി 2025' കൊളോണിൽ അരങ്ങേറി. ഫ്രീഡ്രിഷ് ജിംനാസിയം സ്കൂൾ ഓഡിറ്റോറിയത്തിലാണ് പരിപാടി സംഘടിപ്പിച്ചത്. ഉച്ചകഴിഞ്ഞ് മൂന്നിന് കുട്ടികളുടെ ക്വയർ ആലപിച്ച പ്രാർഥനാ ഗാനത്തോടെയാണ് പരിപാടികൾക്ക് തുടക്കമായത്. കൺവീനർ ആന്റണി സക്കറിയ സ്വാഗതം ആശംസിച്ചു.
തുടർന്ന് കമ്യൂണിറ്റി ചാപ്ലിൻ ഫാ. ഇഗ്നേഷ്യസ് ചാലിശേരി സിഎംഐ, കൊളോൺ അതിരൂപതയിലെ ഇന്റർനാഷനൽ കാത്തലിക് പാസ്റ്ററൽ കെയറിന്റെ ഉപദേഷ്ടാവ് ഇംഗ്ബെർട്ട് മ്യുഹെ, കോഓർഡിനേഷൻ കമ്മറ്റിയംഗങ്ങളായ ആന്റണി സക്കറിയ, ഹാനോ തോമസ് മൂർ, സാബു ചിറ്റിലപ്പിള്ളി, സൗമ്യ ജോസി, ഷീബ കല്ലറയ്ക്കൽ, ബൈജു പോൾ, ജോസ് പുതുശേരി, അൻസ പോൾ, ഷിന്റോ രാജൻ, ആദിൻ ജോസഫ് തുടങ്ങിയവർ ചേർന്ന് ഭദ്രദീപം തെളിയിച്ചു.

ഫാ. ഇഗ്നേഷ്യസ് ചാലിശേരി സിഎംഐ പരിപാടികൾ ഔദ്യോഗികമായി ഉദ്ഘാടനം ചെയ്തു. ഇംഗ്ബെർട്ട് മ്യുഹെ ആശംസകൾ നേർന്നു സംസാരിച്ചു. സാന്ദ്ര വിജു പരിപാടികൾ മോഡറേറ്റ് ചെയ്തു. ആദിൻ ജോസഫ് നന്ദി പ്രകാശിപ്പിച്ചു. ഏകദേശം 100 ഓളം യുവ ആർട്ടിസ്റ്റുകൾ രാഗതാളലയശ്രുതിയിൽ വേദിയിൽ നിറഞ്ഞാടി.
തിരുവാതിര, ഭരതനാട്യം, സിനിമാറ്റിക് മിക്സ്, സെമി ക്ലാസിക്കൽ, ബോളിവുഡ്, ക്ലാസിക്കൽ, സിനിമാറ്റിക് ഫ്യൂഷൻ തുടങ്ങിയ വൈവിധ്യമാർന്ന 13 സംഘനൃത്ത ഇനങ്ങൾ, ഗാനാലാപനം, ആക്ഷൻ പ്ലേ തുടങ്ങിയവ പ്രേക്ഷകരുടെ മനം കവർന്നു. നാല് മണിക്കൂറോളം നീണ്ടുനിന്ന കലാപ്രകടനങ്ങൾ കാണികളെ ആവേശത്തിലാക്കി.

ഫ്രാങ്ക്ഫർട്ടിലെ ‘സ്റ്റേജ് ഇൻ സ്റ്റെപ്സ്’ എന്ന സംഘത്തിലെ യുവകലാകാരന്മാരും കൊച്ചുകുട്ടികളും ചേർന്ന് അവതരിപ്പിച്ച മ്യൂസിക്കൽ ഡാൻസ് ഡ്രാമയായ ‘ദ മൂൺഫാൾ, ഒരു രക്ഷാധികാരിയുടെ ഉദയം’ എന്ന പുതുമ നിറഞ്ഞ കഥാവിഷ്കാരം ഏവരുടെയും പ്രശംസ പിടിച്ചുപറ്റി.

അത്താഴത്തിനു ശേഷം നടന്ന ഡിജെ പാർട്ടിയോടെ സാംസ്കാരിക ഉത്സവത്തിന് തിരശീല വീണു. ഏകദേശം 500 ഓളം പേർ പരിപാടിയിൽ പങ്കെടുത്തു. കൊളോണിലെ എസ്എംവൈഎമ്മിന്റെ നേതൃത്വത്തിൽ വാർഷിക സാംസ്കാരിക മേള നടക്കുന്നത് ഇത് രണ്ടാം തവണയാണ്.
Tags : Indian Catholic Community Indian Culture Fest Germany