ഹൂസ്റ്റൺ: ഹൂസ്റ്റൺ ആസ്ഥാനമായി പ്രവർത്തിക്കുന്ന കോട്ടയം ക്ലബ് ഹൂസ്റ്റൺ നടത്തിയ ഫാമിലി നൈറ്റ് ജനപങ്കാളിത്തത്തോടെയും വൈവിധ്യമാർന്ന പരിപാടികളോടെയും വിജയകരമായി നടത്തപ്പെട്ടു.
സ്റ്റാഫോർഡിലെ മലയാളി അസോസിയേഷൻ ഓഫ് ഗ്രേറ്റർ ഹൂസ്റ്റണിന്റെ (മാഗ്) ഓഡിറ്റോറിയത്തിൽ വച്ച് നടത്തിയ ഫാമിലി നൈറ്റിൽ നിരവധി കലാപരിപാടികൾ നടത്തപ്പെട്ടു. വേണുനാഥ് ഗോപിയുടെ ഈശ്വരപ്രാർഥനയോടെ ആരംഭിച്ച പരിപാടിയിൽ ഷിബു കെ. മാണി സ്വാഗതം പറഞ്ഞു.
കോട്ടയം ക്ലബിന്റെ ആരംഭം മുതൽ ഇതുവരെയും പ്രവർത്തിച്ചവരെ അനുസ്മരിച്ചുകൊണ്ടും ഭാവി
പരിപാടികളുടെ രൂപരേഖയും അവതരിപ്പിച്ചുകൊണ്ടുള്ളതായിരുന്നു സ്വാഗത പ്രസംഗം. തുടർന്ന് വിശിഷ്ഠാതിഥിയായിരുന്ന സ്റ്റാഫ്ഫോർഡ് സിറ്റി മേയർ കെൻ മാത്യു, മാധ്യമ പ്രവർത്തകൻ ബ്ലെസൺ ഹൂസ്റ്റൺ എന്നിവർ ആശംസകൾ നേർന്നു.
അതിനുശേഷം കോട്ടയം ജില്ലയുടെ പൈതൃകത്തേയും പൗരാണികത്തെയും പ്രതിപാതിച്ചുകൊണ്ടും തൃഷ ഷിബു നടത്തിയ വിവരണം ഇവിടെയുള്ള പുതിയ തലമുറയുടെ നാടിനോടുള്ള സ്നേഹം തുറന്നുകാട്ടി.
അതിനുശേഷം കഴിഞ്ഞ വർഷത്തെ ടോപ് ടെൻ നാഷണൽ നഴ്സ് സയന്റിസ്റ്റിൽ ഒരാളായി തെരഞ്ഞെടുക്കപ്പെട്ട കോട്ടയം ക്ലബിന്റെ കമ്മിറ്റി അംഗമായ ജോജി ഈപ്പന്റെ ഭാര്യ ഡോ. ഡോൺസി ഈപ്പനെ ചടങ്ങിൽ ആദരിച്ചു.

കൂടുതൽ പ്രതിബദ്ധതയോടെ പ്രവർത്തിക്കാൻ ഇത് പ്രചോദനമായെന്ന് ആദരിക്കലിന് നന്ദി പറഞ്ഞ് ഡോ. ഡോൺസി ഈപ്പൻ പറഞ്ഞു. തുടർന്ന് ഈ വർഷം നടത്തിയ പിക്ക്നിക്കിൽ കായിക മത്സരത്തിൽ വിജയികളായവർക്ക് മെഡലുകൾ സമ്മാനിക്കുകയുണ്ടായി.
ജോന്ന അജി, ആഞ്ജലീന ബിജോയ്, ബിയ മാറിയ ആൻ ഫിലിപ്പ്, ജയ നേടാറ്റോം തുടങ്ങിയവരുടെ നൃത്തങ്ങളും നടിയും ഗായികയും നർത്തകിയുമായ ലക്ഷി പീറ്റർ, ആൻഡ്രു ജേക്കബ്, സുജിത് ഗോപൻ, മധു ചേരിക്കൽ, ജിജു കോശി, അജി ജോസഫ്, ബിജു എബ്രഹാം, സുഗു ഫിലിപ്പ്, സുജ ബെന്നി, ഡോ. ഡോൺസി ഈപ്പൻ എന്നിവരുടെ ഗാനങ്ങളും ഫാമിലി നെറ്റിനെ ഏറെ ഹൃദ്യമാക്കി.
ഗായകനും മിമിക്രി കലാകാരൻ കൂടിയായ സുജു ഫിലിപ്പ് അവതരിപ്പിച്ച സ്പോട്ട് ഡബിംഗ് കാണികളെ ആനന്ദത്തിലാറാടിച്ചു. ബിജു ശിവനും ബിജോയ് തോമസുമായിരുന്നു പ്രോഗ്രാം കോഓർഡിനേറ്റർമാർ. ട്രീഷ ഷിബു ആയിരുന്നു എംസി.
ജോയിന്റ് സെക്രട്ടറി ബിജു ശിവൻ പരിപാടിയിൽ എത്തിച്ചേർന്ന വിശിഷ്ഠാതിഥികൾക്കും പങ്കെടുത്ത കലാകാരമാർക്കും പ്രയത്നിച്ച എല്ലാവർക്കും സഹകരിച്ചവർക്കും പങ്കെടുത്തവർക്കും നന്ദി പറഞ്ഞു. വിഭവ സമൃദ്ധമായ ഡിന്നറോടെ പരിപാടികൾ പര്യവസാനിച്ചു.