ആലപ്പുഴ: ആലപ്പുഴ റവന്യു ജില്ലാ സ്കൂൾ കലോത്സവം 25 മുതൽ 29 വരെ പ്രധാന വേദിയായ ലിയോ തേർട്ടീന്ത് ഹയർ സെക്കൻഡറി സ്കൂൾ ഉൾപ്പെടെ പന്ത്രണ്ട് വേദികളിൽ നടക്കും. കലോത്സവ ലോഗോയുടെ പ്രകാശനം പി.പി. ചിത്തരഞ്ജൻ എംഎൽഎ നിർവഹിച്ചു. ജില്ലാ വിദ്യാഭ്യാസ ഡെപ്യൂട്ടി ഡയറക്ടർ ശ്രീലത, സ്കൂൾ കലോത്സവ പബ്ലിസിറ്റി വൈസ് ചെയർമാൻ പോരുവഴി ബാലചന്ദ്രൻ, കൺവീനർ സജിത്ത് ലാൽ, അധ്യാപകസംഘടന നേതാക്കളായ പി.ഡി. ജോഷി, ജോൺ ബ്രിട്ടോ, സൂപ്രണ്ട് മീരാദാസ്, സംഘടന നേതാക്കൾ, വിദ്യാഭ്യാസ വകുപ്പിലെ ഉദ്യോഗസ്ഥർ തുടങ്ങിയവർ പങ്കെടുത്തു.
ആലപ്പുഴ ഗവ. ഗേൾസ് ഹയർ സെക്കൻഡറി സ്കൂളിലെ ഒമ്പതാം ക്ലാസ് വിദ്യാർഥിനി ഷെറിൽ സാറാ റെജി രൂപകൽപ്പന ചെയ്ത ലോഗോ ആണ് സ്കൂൾ കലോത്സവ മേളയ്ക്ക് തെരഞ്ഞെടുത്തത്. ലോഗോ തയാറാക്കിയ വിദ്യാർഥിനിക്ക് പ്രശസ്തിപത്രവും കാഷ് അവാർഡും സമ്മാനിക്കുമെന്നു സ്കൂൾ കലോത്സവ പബ്ലിസിറ്റി കൺവീനർ സജിത്ത് ലാൽ അറിയിച്ചു.
ഈ മാസം 17 മുതൽ നടത്താനിരുന്ന റവന്യു ജില്ലാ സ്കൂൾ കലോത്സവം തദ്ദേശ സ്വയംഭരണ തെരഞ്ഞെടുപ്പിനെത്തുടർന്ന് ഡിസംബർ അവസാന തീയതിലേക്കു മാറ്റിയിരുന്നു. ഡിസംബർ 15 മുതൽ ക്രിസ്മസ് പരീക്ഷ തീയതി പ്രഖ്യാപിച്ചതിനാലും പരീക്ഷ അവസാനിക്കുന്ന ദിവസം മുതൽ ക്രിസ്മസ് അവധി ആരംഭിക്കുന്നതിനാലുമാണ് കലോത്സവ തീയതിയിൽ വീണ്ടും മാറ്റം വരുത്തി ഈമാസം അവസാനം നടത്താൻ തീരുമാനിച്ചത്. സംസ്ഥാന സ്കൂൾ കലോത്സവവും ജനുവരി പകുതിയോടെ ആരംഭിക്കുന്നതിനാലുമാണ് കലോത്സവ തീയതിയിൽ വീണ്ടും മാറ്റം വരുത്തിയത്.
Tags : local nattuvishesham Kalotsavam