മരങ്ങാട്ടുപിള്ളി: കുറിച്ചിത്താനം വില്ലേജ് ഓഫീസിനെ സ്മാർട്ട് വില്ലേജ് ഓഫീസാക്കി വിപുലീകരിക്കുന്നതിന്റെ ഭാഗമായുള്ള കെട്ടിട നിർമാണത്തിന് തുടക്കമായി. ഉദ്ഘാടനം മന്ത്രി കെ. രാജൻ ഓൺലൈനിലൂടെ നിർവഹിച്ചു.
മന്ത്രിയുടെ ഉദ്ഘാടന പ്രഖ്യാപനത്തെത്തുടർന്ന് മോൻസ് ജോസഫ് എംഎൽഎ ശിലാഫലകം അനാച്ഛാദനം ചെയ്തു.
കുറിച്ചിത്താനം സ്മാർട്ട് വില്ലേജ് ഓഫീസ് യാഥാർഥ്യമാക്കുന്നതിന് 45 ലക്ഷം രൂപയുടെ കെട്ടിട നിർമാണ പദ്ധതിക്കാണ് ഫണ്ട് അനുവദിച്ചിട്ടുള്ളതെന്നു മന്ത്രി പറഞ്ഞു. സ്മാർട്ട് വില്ലേജ് ഓഫീസിന്റെ നിർമാണ ജോലികൾക്ക് കൂടുതലായി വേണ്ടി വരുന്ന തുകയും കംപ്യൂട്ടർ ആധുനികവത്കരണ ജോലികൾക്കും ഉൾപ്പെടെ ആവശ്യമായ തുക എംഎൽഎ ഫണ്ടിൽനിന്ന് അനുവദിക്കുമെന്നു മോൻസ് ജോസഫ് എംഎൽഎ പറഞ്ഞു.
സമ്മേളനത്തിൽ മോൻസ് ജോസഫ് എംഎൽഎ അധ്യക്ഷത വഹിച്ചു. ഡെപ്യൂട്ടി കളക്ടർ സോളി ആന്റണി പ്രോജക്ട് റിപ്പോർട്ട് അവതരിപ്പിച്ചു. ഉഴവൂർ ബ്ലോക്ക് പഞ്ചായത്ത് പ്രസിഡന്റ് ബിന്ദു സുരേന്ദ്രൻ, പഞ്ചായത്ത് പ്രസിഡന്റ് ഗ്രേസിക്കുട്ടി ഏബ്രഹാം, ജില്ലാ പഞ്ചായത്ത് അംഗം ഷിബി മത്തായി, ബ്ലോക്ക് മെംബർമാരായ ബെൽജി ഇമ്മാനുവൽ, ജൂബി തെക്കേൽ, സിൻസി ജയ്സൺ, പഞ്ചായത്ത് വൈസ് പ്രസിഡന്റ് സബിൻലാൽ ബാബു തുടങ്ങിയവർ പ്രസംഗിച്ചു.
നിർമാണ പ്രവർത്തനങ്ങൾ പൊതുമരാമത്ത് വകുപ്പ് ബിൽഡിംഗ്സ് വിഭാഗത്തെയാണ് ചുമതലപ്പെടുത്തിയിട്ടുള്ളത്.